YANGILIKLAR

Oy: Iyun 2019

13-14 iyun kunlari Toshkent shahrida VI «Markaziy Osiyo, Mo‘g‘uliston, Kavkaz va Afg‘oniston» mintaqaviy forumi (CAMCA – qisqartma inglizchadan) bo‘lib o‘tdi. Forum mintaqada va uning tashqarisida nufuzga ega bo‘lgan turli soha vakillari, yosh yetakchilar va ilg‘or ekspertlar bilan KAMKA mintaqasida sodir bo‘layotgan jarayonlarni yaxshiroq tushunish uchun fikr almashish bo‘yicha noyob imkoniyatni taqdim etadi.

Toshkentda o‘tayotgan forumda ishtirok etish uchun O‘zbekistonga tashrif buyurgan doktor Artur Laffer davlat boshqaruvi sohasi mutaxassisi Aziza Umarova savollariga javob berib, soliq siyosati bo‘yicha o‘z mulohazalarini bildirdi.

 —  Haqiqatan, agar hukumat soliq stavkalarni pasaytirib, yukni kamaytirsa-yu, soliq bazasi kengaymay, byudjetga tushum ko‘paymasa, nima bo‘ladi?

Tamakiga qo‘yilgan soliq, asosan, aholi salomatligini saqlashdan kelib chiqib, o‘rnatiladi. Xavfsiz yo‘llarni barpo etishda tezlikni oshirmaslik uchun jarima qo‘llanadi.

Lekin nega daromadi past bo‘lgan aholi katta miqdordagi soliqqa tortilishi kerak? Nega ish o‘rni yaratib, arzon va sifatli mahsulot ishlab chiqarayotgan kompaniya ko‘proq soliq to‘lashi kerak? Biz endilikda sifatsiz va qimmat mahsulot ishlab chiqarib, ish o‘rnini qisqartirishi uchun ularni soliqqa tortmaymiz.

Yuqorida aytganimdek, tamaki uchun qo‘yilgan soliq ham g‘aznani to‘ldirish uchun belgilanmagan, jarimalar byudjetni to‘ldirmaydi. Korxonalarga katta soliq solib, tushum o‘sishini ham kutish mumkin emas.

Islom atoqli olimi Ibn Haldun o‘zining «Muqadimma» asarida shunday deydi:

«Sulolalar tarixining avvalida soliq yuki kam bo‘lgan, g‘azna esa to‘lib toshgan. Hokimiyat inqirozga yuz tutgan davrga kelib, soliq yuki katta, g‘azna esa bo‘m-bo‘sh edi».

Rivojlanayotgan davlatlar rivojlangan davlatlar tajribasiga nazar tashlasin, uning bugungi kundagi amaliyotiga emas.

Soliq yuki kamaytirilishi soliq to‘lovchilar soni ortishiga olib keladi. Ya’ni daromad past inson ham soliq to‘lashga qurbi yetadi, soliq bazasi kengayadi, iqtisodiyotda faol bo‘lgan jamiyat a’zolari ko‘payadi. Stavkaning oshirilishi kutilmagan salbiy oqibatlarga sababchi bo‘ladi.

Masalan, kuchukni tepsangiz u qochib ketadi, qaerga ketishi esa noma’lum. Agar uni parvarish qilsangiz, endi kuchukning qaerda bo‘lishini albatta bilasiz. Katta soliq yuki ham bir narsadan mujda beradi: daromadlarni yashirish lozim. Jamiyat shu o‘y bilan ish boshlaydi va faoliyatini davom ettiradi.

—  Davlat tasarrufidagi korxona va ishlab chiqarish kompaniyalarini xususiylashtirish masalasiga nima deysiz? Uni amalga oshirishda yodda saqlash lozim bo‘lgan tanqidiy omil nimada? Shunday sharoitda byudjetga tushum kamayib ketmasligi kafolati saqlanib qoladimi?

—  Davlat tasarrufidagi korxonalari haqiqatan  davlat tasarrufidagi sifatida nomiga munosib bo‘lishi kerak. Ular mudofaa, ta’lim, sog‘liqni saqlash kabi masalalarda faoliyat olib boruvchi birliklar bo‘lsa, biznes hukumat qaramog‘idan uzoqroqda bo‘lishi lozim. Hukumat o‘zi bilgan ishni yaxshiroq qilishiga imkoniyat bo‘lishi lozim. Odatda u biznes bilan shug‘ullanmaydi, temir yo‘llar, qishloq xo‘jaligi, aviakompaniyalar xususiy qo‘lga o‘tishi lozim. Ishoning, davlat biznesni samarali boshqara olmaydi. 

Misol uchun, Turkiya mamlakatda xususiylashtirish jarayonini ancha avval boshlagandi, 2008-2016 yillar oralig‘ida bu ishlar yanada jadal davom etdi. Ularning havo yo‘llar kompaniyasi faoliyatini tahlil etsangiz, davlat tasarrufidagi ancha-muncha kompaniyadan ko‘ra samarali va daromadli ekaniga amin bo‘lasiz. Menimcha, bular tushumlarning kamayib ketishiga sabab bo‘lmaydi.

Ma’lumot uchun, Artur Laffer AQShning 40-prezidenti Ronald Reygan va Buyuk Britaniya sobiq Bosh vaziri Margaret Tetcher xonimga maslahatchi bo‘lgan. Uning nomi bilan ataluvchi Laffer effekti esa iqtisodiyotda soliqlarni kamaytirish orqali soliq tushumini ko‘paytirish holatiga nisbatan ishlatiladi. U «Jahon inflyasiya fenomenni» va «Soliqlardan qochishning iqtisodiy nazariyasi» kabi qimmatli asarlar muallifidir.

kun.uz saytidan olindi

Toshkent davlat iqtisodiyot universitetida Germaniyaning SPRINGER NATURE kompaniyasi tomonidan “O‘zbekistonning fan va ta’lim uchun elektron axborot resurslari. SPRINGER NATURE ma’lumotlar bazasi” mavzusida mahorat darsi o‘tkazildi.

O‘tkazilgan seminar davomida “Ilmiy tadqiqot faoliyatida Springerlink platformasidan foydalanish”, “Tadqiqot mavzusiga yuqori reytingli jurnallarni va tadqiqot mavzusidagi maqolani tanlash”, “Yuqori sifatli maqolani tayyorlash va uni chet el jurnallarida nashr etish”, “Springer Nature”da monografiya tayyorlash va nashr qilish” kabi mavzular taqdim etildi va ishtirokchilar tomonidan muhokama qilindi.

Ma’lumot o‘rnida aytib o‘tamiz, SPRINGER NATURE 1842-yildan beri mavjud bo‘lgan dunyodagi eng yirik ilmiy nashriyotlardan biri hisoblanadi.

O‘zbekiston Respublikasi Innovatsion rivojlanish vazirligi va SPRINGER NATURE kompaniyasi o‘rtasida imzolangan memorandumga muvofiq, O‘zbekiston Respublikasi Fanlar akademiyasi kutubxonalari, ilmiy va ilmiy-tadqiqot markazlari 2019 yil may va iyul oylari mobaynida SPRINGER NATURE ilmiy va ta’lim resurslariga bepul kirish imkonini beradi. Ushbu resusrlar ro‘yxatida 3000 dan ortiq ilmiy darajali jurnallar joy olgan.

 

Bugun, 13-iyun kuni Toshkent davlat iqtisodiyot universitetida Yaponiyaning O‘zbekistondagi favqulodda va muxtor elchisi Ito Nobuaki bilan uchrashuv bo‘lib o‘tdi.

Tadbir davomida elchi janoblari tomonidan Yaponiyaning O‘zbekistonga kiritayotgan investitsiyalar sohalari, talabalar almashinuvi loyihasi doirasida faoliyati yo‘lga qo‘yilgan JAICA va Yapon markazi hamda ko‘p tarmoqli davlat grantlari haqida ma’lumotlar berdi.

Yaponiyaning iqtisodiy samaradorligini ta’minlovchi omillar nimalardan iborat degan savolga, buning zamirida maktabda olinadigan ta’lim, oliy ta’limdagi yuqori o‘zlashtirish, ta’limga qaratilayotgan rag‘bat hamda an’analar yotganligini aytib o‘tdi.

Korporativ boshqaruv fakulteti hamda Jahon iqtisodiyoti kafedrasi tomonidan tashkil etilgan uchrashuv davomida elchi janoblari o‘zini yuksak madaniyat sohibi sifatida tutib, talabalar bilan do‘stona muloqot qildi. Martabali mehmon hatto talaba savoliga javob berish uchun sahnadan (sahnaning balandligi 1,2 m.) yoshlarga xos abjirlik bilan pastga sakrab tushdi.

 

 

 

 

 

 

 

 

Germaniyaning nufuzli oliy ta’lim muassasalarida tashkil qilinadigan yozgi kurslarda bepul tahsil olish uchun 4 nafar talabamiz Svikau universitetiga jo‘nab ketishadi.

Buxgalteriya hisobi va audit fakulteti 1-bosqich talabasi Ulug‘bek Azimov, Iqtisodiyot fakulteti 3-bosqich talabalari – Abdulaziz Abdug‘aniyev, Ayubxon Axmadxo‘jayev, Asliddin Xurramovlar nemis tilini B2 darajada o‘rganishgani uchun ushbu grand sohibi bo‘ldilar.
Shuningdek, Germaniyaning dunyo bo‘ylab keng tarqalgan DAAD grandini qo‘lga kiritgan Iqtisodiyot fakulteti 2-bosqich talabasi Abror Gafurov respublika bo‘yicha nemis tilini asosiy fan sifatida o‘qiydigan talabalar bilan bellashib, 400 nafar davogar orasidan bir oylik bepul tahsil olish uchun Germaniyaning Aaxen universitetiga borish imkoniyatini qo‘lga kiritdi.

Toshkent davlat iqtisodiyot universiteti rektori Bahodir Xodiyev ushbu talabalar bilan uchrashib, universitet nomidan muvaffaqiyat bilan tabrikladi.

Talabalarimizning bunday sa’y-harakatlari universitetimiz nufuzini yana bir pog‘onaga yuqoriga olib chiqish uchun zamin bo‘la oladi. Ishonamizki, ular o‘z bilim va nazariy bilimlarini xorijning ilg‘or tajribasi bilan boyitib, mamlakatimiz taraqqiyotiga o‘z hissalarini qo‘shadilar.

Shu o‘rinda universitet rahbariyatiga ko‘rsatilayotgan yordam, ma’naviy va moddiy rag‘bat uchun hamda Jahon tillari kafedrasi nemis tili o‘qituvchilariga o‘z tashakkurimizni bildiramiz.

 

 

Toshkent davlat iqtisodiyot universitetida “Mamlakatimizning statistika salohiyatini oshirish hamda O‘zbekiston Respublikasi Ochiq ma’lumotlar portalini rivojlantirish istiqbollari” mavzusida davra suhbati bo‘lib o‘tdi.

Tadbirda, Davlat statistika qo‘mitasi, Toshkent davlat iqtisodiyot universiteti o‘qituvchilari, ilmiy izlanuvchilari, talabalari hamda ommaviy axborot vositalari xodimlari ishtirok etdi.

Davra suhbatida ta’kidlanganidek, O‘zbekiston Respublikasi Prezidentining 2019 yil 9 apreldagi “Davlat boshqaruvining ochiqligi va shaffofligini ta’minlash hamda mamlakatning statistika salohiyatini oshirish yuzasidan qo‘shimcha chora-tadbirlar to‘g‘risida”gi qaroriga asosan, Davlat statistika qo‘mitasi, davlat organlari va tashkilotlarining ochiq ma’lumotlar to‘plamlari ro‘yxatini shakllantirish, yuritish va yangilash hamda tegishli axborotlarning O‘zbekiston Respublikasi Ochiq ma’lumotlar portali (data.gov.uz)da o‘z vaqtida aks ettirilishi bo‘yicha faoliyatini muvofiqlashtirish uchun mas’ul etib belgilandi.

Tadbir davomida soha mutaxassislari va olimlar tomonidan quyidagi mavzularda taqdimotlar amalga oshirildi:

“O‘zbekiston Respublikasi ijtimoiy-iqtisodiy rivojlanishining asosiy ko‘rsatkichlari”;

“Обеспечение открытости и прозрачности национальной статистики и повышение статистического потенциала страны”;

“O‘zbekiston Respublikasida aholini ro‘yxatga olish bo‘yicha amalga oshirilayotgan ishlar”;

“O‘zbekiston Respublikasi Ochiq ma’lumotlar portalining rivojlantirish istiqbollari”.

Ta’kidlandiki, davlat statistika organlarida amalga oshirilayotgan ishlardan ko‘zlangan asosiy maqsad O‘zbekiston Respublikasida bo‘layotgan ijtimoiy-iqtisodiy o‘zgarishlar va islohotlar to‘g‘risidagi ochiq va haqqoniy ma’lumotlarni xalqaro tashkilotlarning ma’lumotlar bazalarida hamda yetakchi xalqaro reytinglarda aks ettirilishini ta’minlashdir.

Tadbir so‘ngida Davlat statistika qo‘mitasining mas’ul xodimlari ishtirokchilarni qiziqtirgan boshqa savollarga ham atroflicha javob qaytardi.

 

 

 

 

 

O‘zbekiston Respublikasi Vazirlar Mahkamasi huzuridagi Mutaxassislarni xorijda tayyorlash va vatandoshlar bilan muloqot qilish bo‘yicha «El-yurt umidi» jamg‘armasi e’lon qilgan tanlovda 2400 nafar nomzodlar orasidan 517 nafari saralab olindi.

Quvonarlisi mazkur tanlovda Toshkent davlat iqtisodiyot universitetining 56 nafar vakili g‘olib bo‘lib, maxsus sertifikatlarni qo‘lga kiritdi. Endilikda professor-o‘qituvchilarimiz ushbu Sertifikat bilan xorijda tegishli ta’lim dasturi asosida tahsil olishadi va malaka oshirishadi.

Xalqimiz, Prezidentimizning bunday yuksak ishonchini oqlab, horijda egallangan yangi bilim va malakalarini Vatanimiz ravnaqi yo‘lida xizmat qiladigan yuqori bilim va ko‘nikmaga ega bo‘lgan kadrlarni tayyorlash uchun safarbar etishlarida omadlar tilab qolamiz!

 

 

 

 

 

Joriy yilning 7-8 iyun kunlari Toshkent davlat iqtisodiyot universitetida O‘zbekiston Respublikasi Prezidenti tomonidan ilgari surilgan 5 ta tashabbusni oliy ta’lim muassasalarida amalga oshirish hamda ma’naviy-ma’rifiy va tarbiyaviy ishlarni samarali tashkil etish masalalariga bag‘ishlangan o‘quv seminar bo‘lib o‘tdi.

O‘quv seminarda vazirliklar, qo‘mitalar, nodavlat va notijorat tashkilotlar mutasaddilari, 40 nafardan ortiq oliy ta’lim muassasalari rektorlari, 150 nafardan ortiq yoshlar bilan ishlash bo‘yicha prorektor va bo‘lim boshliqlari hamda OAV vakillari ishtirok etdi.

O‘zbekiston Respublikasi Prezidenti tomonidan Sirdaryo va Namangan viloyatlari tajribasi sifatida 2019-yil 19-mart kuni yoshlar ma’naviyatini yuksaltirish va ularning bo‘sh vaqtini mazmunli tashkil etish bo‘yicha 5 ta tashabbus ilgari surilgan edi. Mazkur tashabbuslarni amalga oshirish maqsadida Bo‘ka tumanida tajriba-sinov tariqasidagi Madaniyat va ma’rifat ekoparki faoliyati yo‘lga qo‘yildi. Ta’lim-tarbiya samaradorligini oshirish, yoshlar o‘rtasida kitobxonlik targ‘iboti bo‘yicha madaniy-ma’rifiy o‘tkazildi.

Shuningdek, Prezident Shavkat Mirziyoyev tomonidan 24 may kuni Mirzo Ulug‘bek nomidagi O‘zbekiston Milliy universitetida oliy ta’lim va ilmiy-tadqiqot muassasalari rahbarlari, akademiklar, olimlar, yosh tadqiqotchilar bilan uchrashuv davomida 5 ta tashabbusning targ‘iboti va unda belgilangan dasturlarni amalga oshirish borasida oliy ta’lim muassasalari oldiga yanada aniq vazifalar qo‘yildi.

Shundan kelib chiqib, 5 ta tashabbusning oliy ta’lim tizimidagi ijrosini o‘rganish bo‘yicha komissiya tuzildi hamda uning zimmasiga ma’naviy-ma’rifiy ishlar, tarbiya jarayonlari, talabalar bo‘sh vaqtini samarali o‘tkazish, ularni jismoniy tarbiya va sport, zamonaviy axborot texnologiyalarini o‘zlashtirish kabi masalalar holatiga baho berish hamda mazkur masalada amaliy yordamni tashkil etish bo‘yicha dolzarb vazifalar yuklandi.

Komissiya tashabbusi bilan tashkil etilgan mazkur o‘quv seminarining maqsadi ushbu vazifalarning to‘liq ijrosini ta’minlashga erishishdan iborat.

O‘quv seminari 2 kun davom etib, uning birinchi kunida Komissiya a’zolari tomonidan 5 ta tashabbusni amalga oshirish bo‘yicha aniq chora-tadbirlar qamrab olingan ma’ruzalar o‘qildi. Seminarning ikkinchi kunida nazariy takliflar va tavsiyalarni bevosita amaliyotga joriy etish bo‘yicha amaliy muloqotlar o‘tkazildi. Guruhlarga bo‘lingan holda tashkil etilgan muloqotlarda oliy ta’lim muassasalarida mavjud kamchiliklar tanqidiy tahlil qilindi, holatni yaxshilash mexanizmlari yuzasidan fikr-almashildi. Muloqotlar yakunida 5 ta tashabbusni oliy ta’lim muassasalarida joriy etishga qaratilgan ustuvor vazifalarga bag‘ishlangan yakuniy ma’ruza tinglandi.

Mazkur o‘quv seminarning Toshkent davlat iqtisodiyot universitetida o‘tkazilishi bejiz emas. Zero, mazkur ta’lim muassasasi beshta tashabbusni oliy ta’lim tizimiga joriy etish bo‘yicha tajriba-sinov maydoni sifatida belgilangan bo‘lib, universitetda har bir tashabbusni amalga oshirish bo‘yicha maxsus jihozlangan 5 ta laboratoriya tashkil etilgan. Mazkur laboratoriyalar tashabbuslarni amalga oshirishga qaratilgan ilg‘or tajribalarni ommalashtirish, mavjud kamchiliklarni chuqur tahlil qilish va bartaraf etish, erishilayotgan yutuqlar qamrovini kengaytirishga xizmat qiladigan maydonchaga aylanadi.

O‘quv seminari davomida 5 ta tashabbusning har bir yo‘nalishi bo‘yicha bittadan oliy ta’lim muassasasini namunali qilib tayyorlash va respublikaga o‘rnak qilib ko‘rsatishga kelishib olindi.

Seminar yakunida 5 ta tashabbusning oliy ta’lim muassasalaridagi ijrosini tahlil qilish, aniqlangan kamchiliklarni bartaraf etish va mavjud ahvolni yaxshilashga qaratilgan vazifalar belgilab berildi. Bajarilgan ishlar ijrosini respublika miqyosida o‘rganib borish, ilg‘or tajribalarni ommalashtirish maqsadida o‘quv seminarining har chorakda bir marotaba o‘tkazilishi belgilandi.

 

 

 

 

 

 

 

 

 

 

 

O‘zbekiston Respublikasi Vazirlar Mahkamasining qarori

Oliy ta’lim muassasalariga o‘qishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari to‘g‘risida

O‘zbekiston Respublikasi Prezidentining «Oliy ta’lim muassasalarida ta’lim sifatini oshirish va ularning mamlakatda amalga oshirilayotgan keng qamrovli islohotlarda faol ishtirokini ta’minlash bo‘yicha qo‘shimcha chora-tadbirlar to‘g‘risida» 2018 yil 5 iyundagi PQ-3775-son qarori ijrosini ta’minlash, shuningdek, chet tilini bilish darajasi bo‘yicha tegishli sertifikatga ega bo‘lgan abiturientlarni qo‘llab-quvvatlash maqsadida Vazirlar Mahkamasi qaror qiladi:

  1. O‘zbekiston Respublikasi Vazirlar Mahkamasi huzuridagi Davlat test markazi (keyingi o‘rinlarda Davlat test markazi deb ataladi), Oliy va o‘rta maxsus ta’lim vazirligi hamda Xalq ta’limi vazirligining taklifiga muvofiq 2019/2020 o‘quv yilidan boshlab oliy ta’lim muassasalariga o‘qishga kirish sinovlarida quyidagi imtiyozlar belgilansin:
  2. a) test sinovlari (kasbiy (ijodiy) imtihon) majmuasiga chet tili (ingliz, nemis, fransuz, ispan, turk, arab, fors, dari, hind, urdu, xitoy, koreys, uyg‘ur, italyan, yapon tillari) (keyingi o‘rinlarda chet tili deb ataladi) birinchi (asosiy) fan sifatida kiritilgan bakalavriat ta’lim yo‘nalishlariga hujjat topshirgan va Davlat test markazi tomonidan beriladigan chet tilini bilish darajasi to‘g‘risidagi sertifikat (keyingi o‘rinlarda milliy sertifikat deb ataladi) yoki xalqaro sertifikatning quyidagi darajalariga ega bo‘lgan abiturientlarga ushbu fandan imtihonlarsiz belgilangan maksimal ball beriladi:

ingliz tili uchun — milliy sertifikat yoki International English Language Testing System (IELTS 5,5), Test of English as a Foreign Language (TOEFL IBT 72), Cambridge Assessment English FCE xalqaro imtihon tizimlari bo‘yicha tilni bilish darajalari B2 va undan yuqori;

yapon tili uchun — milliy sertifikat yoki Japanese Language Proficiency Test (JLPT № 2) xalqaro imtihon tizimlari bo‘yicha tilni bilish darajalari B2 va undan yuqori;

nemis tili uchun — milliy sertifikat yoki Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF) xalqaro imtihon tizimlari bo‘yicha tilni bilish darajalari B2 va undan yuqori;

fransuz tili uchun — milliy sertifikat yoki Diplôme d’Etudes en Langue Française (DELF), Test de Connaissance du Français (TCF) xalqaro imtihon tizimlari bo‘yicha tilni bilish darajalari B2 va undan yuqori;

boshqa tillar uchun — milliy sertifikat yoki xalqaro imtihon tizimlari bo‘yicha tilni bilish darajalari B2 va undan yuqori;

  1. b) test sinovlari (kasbiy (ijodiy) imtihon) majmuasiga chet tili birinchi (asosiy) bo‘lmagan fan sifatida kiritilgan boshqa bakalavriat ta’lim yo‘nalishlariga (Toshkent davlat yuridik universiteti bakalavriat ta’lim yo‘nalishlari bundan mustasno) hujjat topshirgan va milliy yoki xalqaro sertifikatning quyidagi darajalariga ega bo‘lgan abiturientlarga ushbu fandan imtihonlarsiz belgilangan maksimal ball beriladi:

ingliz tili uchun — milliy sertifikat yoki International English Language Testing System (IELTS 4,5), Test of English as a Foreign Language (TOEFL IBT 42), Cambridge Assessment English PET xalqaro imtihon tizimlari bo‘yicha tilni bilish darajalari B1 va undan yuqori;

yapon tili uchun — milliy sertifikat yoki Japanese Language Proficiency Test (JLPT № 3) xalqaro imtihon tizimlari bo‘yicha tilni bilish darajalari B1 va undan yuqori;

nemis tili uchun — milliy sertifikat yoki Goethe-Zertifikat, Deutsches Sprachdiplom (DSD) xalqaro imtihon tizimlari bo‘yicha tilni bilish darajalari B1 va undan yuqori;

fransuz tili uchun — milliy sertifikat yoki Diplôme d’Etudes en Langue Française (DELF), Test de Connaissance du Français (TCF) xalqaro imtihon tizimlari bo‘yicha tilni bilish darajalari B1 va undan yuqori;

boshqa tillar uchun — milliy sertifikat yoki xalqaro imtihon tizimlari bo‘yicha tilni bilish darajalari B1 va undan yuqori;

  1. v) Toshkent davlat yuridik universitetining bakalavriat ta’lim yo‘nalishlariga hujjat topshirgan va milliy yoki xalqaro sertifikatning quyidagi darajalariga ega bo‘lgan abiturientlarga ushbu fandan imtihonlarsiz belgilangan maksimal ball beriladi:

ingliz tili uchun — milliy sertifikat yoki International English Language Testing System (IELTS 5,5 (bunda writing modulidan 5,5 ball)), Test of English as a Foreign Language (TOEFL IBT 72), Cambridge Assessment English FCE va CAE xalqaro imtihon tizimlari bo‘yicha tilni bilish darajalari B2 va undan yuqori;

yapon tili uchun — milliy sertifikat yoki Japanese Language Proficiency Test (JLPT № 2) xalqaro imtihon tizimlari bo‘yicha tilni bilish darajalari B2 va undan yuqori;

nemis tili uchun — milliy sertifikat yoki Goethe-Zertifikat, Deutsches Sprachdiplom (DSD II) xalqaro imtihon tizimlari bo‘yicha tilni bilish darajalari B2 va undan yuqori;

fransuz tili uchun — milliy sertifikat yoki Diplôme d’Etudes en Langue Française (DELF), Test de Connaissance du Français (TCF4) xalqaro imtihon tizimlari bo‘yicha tilni bilish darajalari B2 va undan yuqori;

boshqa tillar uchun — milliy sertifikat yoki xalqaro imtihon tizimlari bo‘yicha tilni bilish darajalari B2 va undan yuqori;

  1. g) kirish sinovlari (kasbiy (ijodiy) imtihon) majmuasiga chet tili fani kiritilgan magistratura mutaxassisliklariga (Toshkent davlat yuridik universiteti magistratura mutaxassisliklari bundan mustasno) hujjat topshirgan milliy sertifikat yoki xalqaro sertifikatning quyidagi darajalariga ega bo‘lgan talabgorlarga mazkur fandan imtihonlarsiz belgilangan maksimal ball beriladi:

ingliz tili uchun — milliy sertifikat yoki International English Language Testing System (IELTS 5,5), Test of English as a Foreign Language (TOEFL IBT 72), Cambridge Assessment English FCE xalqaro imtihon tizimlari bo‘yicha tilni bilish darajalari B2 va undan yuqori;

yapon tili uchun — milliy sertifikat yoki Japanese Language Proficiency Test (JLPT № 2) xalqaro imtihon tizimlari bo‘yicha tilni bilish darajalari B2 va undan yuqori;

nemis tili uchun — milliy sertifikat yoki Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF) xalqaro imtihon tizimlari bo‘yicha tilni bilish darajalari B2 va undan yuqori;

fransuz tili uchun — milliy sertifikat yoki Diplôme d’Etudes en Langue Française (DELF), Test de Connaissance du Français (TCF) xalqaro imtihon tizimlari bo‘yicha tilni bilish darajalari B2 va undan yuqori;

boshqa tillar uchun — milliy sertifikat yoki xalqaro imtihon tizimlari bo‘yicha tilni bilish darajalari B2 va undan yuqori.

Toshkent davlat yuridik universitetining magistratura mutaxassisliklariga hujjat topshirgan va milliy yoki xalqaro sertifikatlarning tegishli darajalariga ega bo‘lgan abiturientlarga Toshkent davlat yuridik universiteti magistraturasiga o‘qishga qabul qilish tartibiga muvofiq chet tili fanidan imtihonlarsiz belgilangan maksimal ball beriladi.

  1. 2020/2021 o‘quv yilidan boshlab test sinovlari (kasbiy (ijodiy) imtihon) majmuasiga chet tili fani kiritilgan barcha bakalavriat ta’lim yo‘nalishlariga hujjat topshirgan va milliy yoki xalqaro sertifikatning quyidagi darajalariga ega bo‘lgan abiturientlarga ushbu fandan imtihonlarsiz belgilangan maksimal ball berilishi nazarda tutilsin:

ingliz tili uchun — milliy sertifikat yoki International English Language Testing System (IELTS 5,5 (bunda Toshkent davlat yuridik universiteti uchun writing modulidan 5,5 ball)), Test of English as a Foreign Language (TOEFL IBT 72), Cambridge Assessment English FCE xalqaro imtihon tizimlari bo‘yicha tilni bilish darajalari B2 va undan yuqori;

yapon tili uchun — milliy sertifikat yoki Japanese Language Proficiency Test (JLPT № 2) xalqaro imtihon tizimlari bo‘yicha tilni bilish darajalari B2 va undan yuqori;

nemis tili uchun — milliy sertifikat yoki Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF) xalqaro imtihon tizimlari bo‘yicha tilni bilish darajalari B2 va undan yuqori;

fransuz tili uchun — milliy sertifikat yoki Diplôme d’Etudes en Langue Française (DELF), Test de Connaissance du Française (TCF4) xalqaro imtihon tizimlari bo‘yicha tilni bilish darajalari B2 va undan yuqori;

boshqa tillar uchun — milliy sertifikat yoki xalqaro imtihon tizimlari bo‘yicha tilni bilish darajalari V2 va undan yuqori.

  1. 2019 yilga qadar Davlat test markazi tomonidan berilgan milliy sertifikatning imtiyozi ushbu sertifikatlarning amal qilish muddati davrida saqlanib qolinsin.
  2. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.
  3. Davlat test markazi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
  4. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari A.A. Abduxakimov hamda Vazirlar Mahkamasi huzuridagi Davlat test markazi direktori M.M. Karimov zimmasiga yuklansin.

O‘zbekiston Respublikasining Bosh vaziri A. ARIPOV

Toshkent sh.,

2019 yil 13 may,

395-son

Vazirlar Mahkamasining 2019 yil 13 maydagi 395-son qaroriga
ILOVA

O‘zbekiston Respublikasi Hukumatining ayrim qarorlariga kiritilayotgan o‘zgartirish va qo‘shimchalar

  1. Vazirlar Mahkamasining «Ta’lim muassasalarida chet tillarini o‘qitishning sifatini yanada takomillashtirish chora-tadbirlari to‘g‘risida» 2017 yil 11 avgustdagi 610-son qarorining 3-bandida:
  2. a) birinchi xatboshidagi «3» raqami «2» raqami bilan almashtirilsin;
  3. b) uchinchi va to‘rtinchi xatboshilar chiqarib tashlansin;
  4. v) beshinchi xatboshi uchinchi xatboshi deb hisoblansin.
  5. Vazirlar Mahkamasining «Chet tilini bilish darajasini aniqlash va malaka sertifikati berish tartibi to‘g‘risidagi nizomni tasdiqlash haqida» 2013 yil 31 dekabrdagi 352-son qarori (O‘zbekiston Respublikasi QT, 2013 y., 12-son, 97-modda) 1-ilovasining matni quyidagi tahrirda bayon etilsin:

«Chet tilini bilish darajasini aniqlash va malaka sertifikatini berish tartibi to‘g‘risida

NIZOM

1-bob. Umumiy qoidalar

  1. Ushbu Nizom O‘zbekiston Respublikasi Prezidentining «Chet tillarni o‘rganish tizimini yanada takomillashtirish chora-tadbirlari to‘g‘risida» 2012 yil 10 dekabrdagi PQ-1875-son qaroriga muvofiq chet tillarni bilish darajasini aniqlash va davlat namunasidagi malaka sertifikatini berish tartibini belgilaydi.
  2. Chet tilini bilish darajasini aniqlash va davlat namunasidagi malaka sertifikatini (keyingi o‘rinlarda sertifikat deb ataladi) berish O‘zbekiston Respublikasi Vazirlar Mahkamasi huzuridagi Davlat test markazi (keyingi o‘rinlarda Davlat test markazi deb ataladi) tomonidan to‘lov asosida amalga oshiriladi.

Chet tilini bilish darajasini aniqlash va sertifikat berish uchun talabgor tomonidan ariza berilgan kundagi eng kam ish haqining 1,5 baravari miqdorida to‘lov undiriladi.

  1. Sertifikat test sinovlari yakunlari bo‘yicha eng yuqori ballning kamida 60 foizini to‘plagan shaxslarga 2 yil muddatga beriladi.

2-bob. Chet tilini bilish darajasini aniqlash

  1. Chet tilini bilish darajasi test sinovi, yozma ish va og‘zaki suhbat o‘tkazish yo‘li bilan aniqlanadi, u quyidagi bo‘limlardan iborat bo‘ladi:
  2. a) «tinglab tushunish» bo‘limi — og‘zaki nutqni qabul qilish ko‘nikmalarini, eshitilgan matnlardagi asosiy fikr va detalni tushunish mahoratini tekshiradi;
  3. b) «o‘qish» bo‘limi — o‘qilgan matnlardagi asosiy fikr va detalni tushunish mahoratini tekshiradi;
  4. v) «leksik va grammatik kompetensiyalar» bo‘limi — grammatik tuzilishni va lug‘at zaxirasini farqlash hamda ulardan to‘g‘ri foydalanish mahoratini tekshiradi;
  5. g) «yozma ish» bo‘limi — tegishli darajadagi grammatik tuzilishdan va talabgorning lug‘at zaxirasidan foydalangan holda berilgan mavzular bo‘yicha bir-biri bilan bog‘langan matnlar tuzish mahoratini tekshiradi;
  6. d) «gapirish» bo‘limi — tegishli darajadagi grammatik tuzilishdan va lug‘at zaxirasidan foydalangan holda, berilgan savollarga mos javob berish va o‘z nuqtai nazarini asoslash mahoratini tekshiradi.
  7. Test sinovini o‘tkazish uchun topshiriqlar O‘zbekiston Respublikasi uzluksiz ta’lim tizimining davlat ta’lim standartiga muvofiq har bir daraja (A2, A2+, V1, V1+, V2, S1) uchun Davlat test markazi tomonidan ishlab chiqiladi.
  8. Chet tilini bilish darajasini aniqlash yuzasidan talabgorlarni test sinoviga mustaqil tayyorlash uchun zarur materiallar Davlat test markazining Internet jahon axborot tarmog‘idagi rasmiy veb-saytiga joylashtiriladi.
  9. Test sinovini o‘tkazish tartibi Davlat test markazi tomonidan belgilanadi.

3-bob. Chet tilini bilish darajasini aniqlash bo‘yicha test sinovini tashkil etish

  1. Talabgor chet tilini bilish darajasini aniqlash va sertifikatni olish maqsadida test sinovida qatnashishga ro‘yxatdan o‘tish uchun Davlat test markazining Internet jahon axborot tarmog‘idagi rasmiy veb-sayti orqali onlayn yoki bevosita Davlat test markazi va uning viloyatlardagi hududiy bo‘linmalariga (ushbu Nizomning 1-ilovasiga muvofiq shakl bo‘yicha) ariza bilan murojaat qiladi.
  2. Quyidagi ma’lumotlarning aniqligi uchun ariza beruvchi shaxsan javobgar hisoblanadi:

shaxsini tasdiqlovchi hujjat (pasport, tug‘ilganlik to‘g‘risidagi guvohnoma) to‘g‘risida ma’lumot;

3,5 x 4,5 sm o‘lchamli rangli, orqa foni oq rangdagi fotosurat;

chet tilini bilish darajasini aniqlash va malaka sertifikati olish uchun to‘lov to‘langanligini tasdiqlovchi hujjat.

Talabgor shaxsini tasdiqlovchi hujjat nusxasi va to‘lov to‘langanligini tasdiqlovchi hujjat nusxalari va 3,5 x 4,5 sm o‘lchamli fotosuratni Davlat test markaziga yoki Davlat test markazining hududiy bo‘linmalariga shaxsan olib kelib topshiradi.

Bunda Davlat test markazi xodimi tomonidan shaxsini tasdiqlovchi hujjat asosida talabgorning elektron barmoq izi va fotosurati olinib ro‘yxatdan o‘tadi.

  1. Talabgorning tushgan arizasi Davlat test markazi tomonidan yetti ish kuni mobaynida ko‘rib chiqiladi. To‘g‘ri rasmiylashtirilgan hujjatlar asosida talabgor ro‘yxatdan o‘tkaziladi hamda test sinoviga qo‘yiladigan talabgorlar ro‘yxatiga kiritiladi. Ro‘yxatdan o‘tkazishda talabgorga test sinovidan o‘tish qoidalari to‘g‘risidagi eslatma beriladi.

Zarur hujjatlar talab darajasida rasmiylashtirilmaganda, Davlat test markazi bu to‘g‘risida talabgorning ro‘yxatdan o‘tish davrida ko‘rsatgan elektron pochtasiga xabar yuboradi yoki telefon orqali talabgorni xabardor qiladi. Talabgor bir hafta mobaynida hujjatlarni to‘g‘ri rasmiylashtirish va ularni Davlat test markaziga qayta taqdim etish huquqiga ega.

  1. Davlat test markazi xodimlari tomonidan ariza beruvchilar to‘g‘risidagi shaxsiy ma’lumotlar maxfiyligi ta’minlanadi. Qonun hujjatlarida belgilangan tartibda vakolatli davlat organlari tomonidan rasmiy murojaat bo‘lgan taqdirda ariza beruvchilar to‘g‘risidagi ma’lumotlar taqdim etiladi.
  2. Test sinoviga qo‘yiladigan talabgorlar ro‘yxati, uni o‘tkazish sanasi va joyi to‘g‘risidagi axborot Davlat test markazining Internet jahon axborot tarmog‘idagi rasmiy veb-saytida e’lon qilinadi. Test sinovini o‘tkazish sanasi u o‘tkaziladigan kundan kamida bir hafta oldin e’lon qilinadi. Test sinovini o‘tkazish joyi va sanasi Davlat test markazi tomonidan belgilanadi.
  3. Test sinovi guruhlarning shakllantirilishiga qarab, talabgor ro‘yxatdan o‘tkazilgan kundan boshlab olti hafta ichida o‘tkaziladi.

Talabgorning test sinovida belgilangan o‘tirish joyi Davlat test markazi tomonidan qur’a tashlash yo‘li bilan aniqlanadi.

  1. Test sinovi blankalarda yoki kompyuterda, tegishli dasturiy ta’minotdan foydalangan holda, shu jumladan, Internet jahon axborot tarmog‘i orqali masofadan o‘tkaziladi. Test sinovi Davlat test markazi tomonidan tasdiqlangan imtihon komissiyasi a’zolari va kuzatuvchilar ishtirokida o‘tkaziladi.

Test sinovi blankalarda o‘tkazilganda ikki bosqichdan iborat bo‘ladi. Bunda birinchi bosqich «tinglab tushunish», «o‘qish», «leksik va grammatik kompetensiyalar», «yozma ish» bo‘limlaridan, ikkinchi bosqich «gapirish» bo‘limidan tashkil topadi.

Test tegishli dasturiy ta’minot asosida kompyuterda o‘tkazilganda barcha bo‘limlar qamrab olingan holda bir bosqichda amalga oshiriladi.

Test sinovi internet jahon axborot tarmog‘i orqali masofadan o‘tkazilganda, u Internet tarmog‘idan foydalanadigan davlat ta’lim muassasalarining axborot-resurs markazlarida bo‘lib o‘tadi. Test sinovi Davlat test markazi xodimining rahbarligida va kuzatuvida o‘tkaziladi. Talabgorlar Davlat test markazining Internet jahon axborot tarmog‘idagi rasmiy veb-sayti orqali tizimda ro‘yxatdan o‘tkaziladi va ular bajarish uchun test sinovi topshiriqlaridan foydalanish imkoniyatiga ega bo‘ladi. Talabgorlarning test sinovi topshiriqlariga javoblari avtomatik ravishda, onlayn rejimida Davlat test markazining ma’lumotlar bazasiga tekshirish uchun yuboriladi.

Test sinovi vaqtida har bir ish joyida bir nafar talabgor o‘tiradi. Test sinovini o‘tkazish jarayoni videotasvirga tushiriladi.

  1. Test sinovini o‘tkazish uchun kuzatuvchilar jalb etilishi mumkin. Bunday hollarda ular bilan shartnoma tuziladi.
  2. «Tinglab tushunish», «o‘qish», «leksik va grammatik kompetensiyalar», «yozma ish» bo‘limlari bo‘yicha bilimlar maxsus dasturlar yordamida kompyuterda tekshiriladi. «Yozma ish» va «gapirish» bo‘limlari bo‘yicha bilimlar imtihon komissiyasi tomonidan tekshiriladi, natijalari rasmiylashtiriladi.

Imtihon komissiyasi tarkibi Davlat test markazi direktorining buyrug‘i bilan tasdiqlanadi, unga Davlat test markazi xodimlari va tajribali pedagoglar, malakali mutaxassislar kiritiladi.

  1. Talabgor shaxsini tasdiqlovchi hujjat (pasport, tug‘ilganlik to‘g‘risidagi guvohnoma) asosida barmoq izi tekshirilib test sinoviga qo‘yiladi.
  2. Test sinovlarini o‘tkazish vaqti:

A2, A2+ darajasi uchun — «tinglab tushunish», «o‘qish», «leksik va grammatik kompetensiyalar», «yozma ish» uchun — 150 daqiqa, «gapirish» uchun — 10 daqiqa;

V1, V1+ darajasi uchun — «tinglab tushunish», «o‘qish», «leksik va grammatik kompetensiyalar», «yozma ish» uchun — 185 daqiqa, «gapirish» uchun — 15 daqiqa;

V2 darajasi uchun — «tinglab tushunish», «o‘qish», «leksik va grammatik kompetensiyalar», «yozma ish» uchun — 200 daqiqa, «gapirish» uchun — 15 daqiqa;

S1 darajasi uchun — «tinglab tushunish», «o‘qish», «leksik va grammatik kompetensiyalar», «yozma ish» uchun — 210 daqiqa, gapirish uchun 20 — daqiqani tashkil etadi.

  1. Test sinovlari formati: «Tinglab tushunish», «o‘qish», «leksik va grammatik kompetensiyalar» bo‘limlarining har biri 30 ta savoldan iborat bo‘ladi;

«yozma ish» bo‘limi A2, A2+, V1, V1+, V2 darajalari uchun ikkita yozma topshiriqdan, S1 darajasi uchun uchta yozma topshiriqdan (darajaga bog‘liq holda birinchi topshiriq — 30 — 150 ta so‘zdan, ikkinchi topshiriq — 50 — 250 ta so‘zdan, uchinchi topshiriq — 80 — 100 ta so‘zdan);

«og‘zaki suhbat» bo‘limi topshiriqlarning uchta turidan iborat bo‘ladi.

  1. Test sinovi har bir bo‘limining eng yuqori bahosi 30 ballni va barcha bo‘limlar uchun maksimal baho 150 ballni tashkil etadi.
  2. Test sinovi o‘tkazilayotgan auditoriyaga har qanday adabiyotni, telekommunikatsiya va texnika vositalarini olib kirish qat’iyan man etiladi. Test sinovi o‘tkazilayotgan vaqtda boshqa talabgorlar bilan muloqot qilishga, savollar kitobi varaqlarini yirtib olishga, savollar kitobini boshqa talabgorlarga berishga, test sinovini o‘tkazish jarayoniga xalaqit qilishga, test sinovlari tugagandan so‘ng yozishda davom etishga, boshqa talabgorga hyech qanday buyum uzatishga ruxsat etilmaydi. Ushbu talablarni buzgan talabgor auditoriyadan chiqarib yuboriladi va test sinovidan o‘tmagan deb hisoblanadi. Test sinovidan chiqarib yuborilgan talabgorlar to‘g‘risida ushbu Nizomning 2-ilovasidagi shakl bo‘yicha dalolatnoma rasmiylashtiriladi.
  3. Test sinovlari natijalari ular yakunlangan kundan boshlab uch haftadan kechikmay Davlat test markazining Internet jahon axborot tarmog‘idagi rasmiy veb-saytida e’lon qilinadi.
  4. Test sinovi yakunlari bo‘yicha eng yuqori ballning 60 foizidan kam (90 balldan kam) ball olgan talabgor daraja shartlarini bajarmagan deb hisoblanadi va qayta qatnashish uchun, test sinovlari o‘tkazilgan kundan boshlab kamida bir oydan keyin, chet tilini bilish darajasini aniqlash va sertifikatni olish uchun belgilangan tartibda ariza bilan murojaat qilib to‘lov to‘lagan taqdirda test sinovlariga qo‘yiladi.

4-bob. To‘lov shartlari

  1. Talabgor Davlat test markazining Internet jahon axborot tarmog‘idagi rasmiy veb-saytida onlayn ariza to‘ldirgandan so‘ng, uning elektron manziliga Davlat test markazi tomonidan elektron ariza va to‘lovni amalga oshirish uchun kvitansiya yuboriladi.

To‘lov istalgan bank yoki amaldagi elektron to‘lov tizimlari orqali amalga oshirilishi mumkin.

  1. Talabgor mazkur Nizomning 9-bandida nomlari keltirilgan hujjatlarni Davlat test markazi yoki Davlat test markazining hududiy bo‘linmalariga topshirganidan so‘ng Davlat test markazi va talabgor o‘rtasida shartnoma tuzilgan hisoblanadi.
  2. Agar ariza beruvchi turli sabablarga ko‘ra test sinovlarida ishtirok eta olmaydigan bo‘lsa, Davlat test markaziga test sinovlari o‘tkaziladigan kundan 7 kun avval yozma murojaat etishi lozim. Bunda, talabgorning xohishiga ko‘ra navbatdagi test sinovlariga kiritiladi yoki to‘langan yig‘im 100 foiz miqdorda talabgorga qaytariladi (to‘lov amaldagi elektron tizim orqali amalga oshirilganda, ko‘rsatilgan xizmat uchun undirilgan yig‘imdan tashqari).

Talabgor test sinoviga kechikkan yoki uzrsiz sababga ko‘ra kelmagan hollarda, uning arizasiga binoan to‘langan yig‘imning 50 foiz miqdori qaytariladi.

  1. Test sinovi qoidalarini buzganlik uchun auditoriyadan chiqarib yuborilgan taqdirda amalga oshirilgan to‘lov talabgorga qaytarilmaydi.
  2. Uzrli sababga ko‘ra test sinovlarida qatnasha olmagan talabgor test sinovlari tugagan kundan boshlab besh ish kunida ushbu holatni tasdiqlovchi hujjatlarni Davlat test markaziga bevosita yoki elektron tarzda taqdim etishi lozim.

Talabgor kechikkan taqdirda test sinoviga qo‘yilmaydi. Agar talabgor test sinoviga uzrli sababga ko‘ra (tegishli hujjat bilan tasdiqlanganda) kelmaganda, uning arizasi asosida unga navbatdagi test sinovidan (gapirish ko‘nikmasi uchun boshqa vaqtda) o‘tishga ruxsat etiladi. Test sinovini boshqa vaqtga ko‘chirish to‘g‘risidagi qaror Davlat test markazi tomonidan qabul qilinadi.

  1. Test sinovi o‘tkazilishi jarayonida talabgorning faqat bitta chet tilidan test topshirishiga ruxsat etiladi.

5-bob. Apellyasiyalarni ko‘rib chiqish tartibi

  1. Test natijalaridan norozi bo‘lgan talabgor Davlat test markaziga apellyasiya taqdim etish huquqiga ega. Apellyasiya test sinovi natijalari e’lon qilingan kundan boshlab besh ish kuni mobaynida, ushbu Nizomning 3-ilovasiga muvofiq yozma yoki elektron shaklda taqdim etiladi.
  2. Apellyasiyani ko‘rib chiqish uchun Davlat test markazi direktorining buyrug‘i bilan 5 — 7 nafar Davlat test markazi xodimlari va ta’lim tizimi pedagoglaridan iborat bo‘lgan Apellyasiya komissiyasi tuziladi.

Apellyasiya ikki hafta mobaynida ko‘rib chiqiladi. Talabgor Apellyasiya komissiyasi qarori to‘g‘risida yozma yoki elektron shaklda xabardor qilinadi.

Talabgor Apellyasiya komissiyasi qaroridan norozi bo‘lganda, sudga murojaat qilish huquqiga ega.

  1. Apellyasiyani ko‘rib chiqish natijalari bo‘yicha quyidagi qarorlardan biri qabul qilinadi:

test sinovi natijalarini o‘zgarishsiz qoldirish va apellyasiyaning qondirilishini rad etish;

test sinovlari natijalarini o‘zgartirish va apellyasiyani qondirish;

test natijalarini bekor qilish va takroriy test sinovi o‘tkazilishini tayinlash.

Agar talabgor tomonidan ko‘rsatilgan dalillar tasdiqlanmasa, apellyasiyaning qondirilishini rad etish to‘g‘risida qaror qabul qilinadi. Test sinovi natijalarini bekor qilish to‘g‘risidagi qaror ushbu Nizom talablari buzilgan holda o‘tkazilgan taqdirda qabul qilinadi. Apellyasiya komissiyasining qarorlari ushbu Nizomning 4-ilovasiga muvofiq rasmiylashtiriladi.

Talabgorni takroriy test sinovidan o‘tkazish to‘g‘risida qaror qabul qilingan taqdirda, Davlat test markazi test sinovini o‘tkazish sanasini belgilaydi va test sinovini takroran o‘tkazishda to‘lov undirilmaydi.

  1. Takroriy apellyasiyaga yo‘l qo‘yilmaydi.

6-bob. Chet tilini bilish darajasi to‘g‘risida davlat namunasidagi malaka sertifikatini berish tartibi

  1. Test sinovidan muvaffaqiyatli o‘tgan talabgorga test sinovi natijalari e’lon qilingan kundan boshlab bir hafta mobaynida, Davlat test markazi buyrug‘i asosida sertifikat beriladi.
  2. Sertifikat qat’iy hisobot yuritiladigan hujjat hisoblanadi, hisobga olish seriyasiga, tartib raqamiga va himoyalanganlik darajasiga ega bo‘ladi. Blankalar Davlat test markazi buyurtmasiga binoan, bosmaxona usulida O‘zbekiston Respublikasi Markaziy banki huzuridagi «Davlat belgisi» davlat ishlab chiqarish birlashmasida tayyorlanadi. Davlat test markazi direktori sertifikatlar blankalarining hisobga olinishi, ularning saqlanishi va ulardan maqsadli foydalanilishi yuzasidan belgilangan tartibda shaxsan javobgar bo‘ladi.
  3. Davlat test markazi sertifikatlar reestrini yuritadi.

Sertifikatlar reestrida quyidagilar ko‘rsatilishi lozim:

talabgorning familiyasi, ismi, otasining ismi;

pasport ma’lumotlari (seriyasi va tartib raqami, pasportning kim tomonidan va qachon berilganligi) yoki tug‘ilganlik to‘g‘risidagi guvohnomasi ma’lumotlari (tartib raqami, guvohnomaning kim tomonidan va qachon berilganligi);

Davlat test markazining sertifikat berish to‘g‘risidagi buyrug‘ining sanasi va tartib raqami;

sertifikatning hisobga olish seriyasi va tartib raqami;

sertifikatning berilgan sanasi;

sertifikatning amal qilish muddati.

  1. Sertifikat pasport ko‘rsatilgan taqdirda, shaxsan talabgorga yoki talabgorning notarial tasdiqlangan ishonchnomasi asosida boshqa shaxsga beriladi.
  2. Yo‘qolgan, talabgorning aybi bilan ma’lumotlar noto‘g‘ri kiritilgan yoki yaroqsiz holga kelgan sertifikat o‘rniga talabgorning arizasiga ko‘ra dublikat beriladi.

Sertifikatni egasi malaka sertifikati yo‘qolganligi to‘g‘risida ommaviy axborot vositalarida e’lon beradi hamda Davlat test markaziga dublikat berish to‘g‘risidagi ariza va dublikat berilganligi uchun to‘lov to‘langanligini tasdiqlovchi hujjat bilan birga ommaviy axborot vositalaridagi e’lonning tasdig‘ini taqdim etadi (talabgorning aybi bilan noto‘g‘ri kiritilgan ma’lumotlar uchun ariza berganlar bundan mustasno).

Sertifikatni dublikati malaka sertifikatining yangi blankasida «Dublikat» yozuvi majburiy ko‘rsatilgan holda, aynan oldingi tartib raqami hamda ilgari belgilangan amal qilish muddati bilan beriladi.

Yaroqsiz holga kelgan sertifikat Davlat test markaziga qaytariladi.

Malaka sertifikatining dublikati berilganligi uchun eng kam ish haqining 50 foizi miqdorida to‘lov undiriladi.

7-bob. Yakunlovchi qoidalar

  1. Ushbu Nizomni qo‘llashda yuzaga keladigan nizolar qonun hujjatlarida belgilangan tartibda hal etiladi.
  2. Ushbu Nizom talablarining buzilishida aybdor bo‘lgan shaxslar qonun hujjatlarida belgilangan tartibda javob beradilar».

O‘zbekiston Respublikasi Prezidentining qarori

Oliy ta’lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida

Qayd etish lozimki, 2018/2019 o‘quv yilida ilk marotaba oliy ta’lim muassasalari bakalavriat ta’lim yo‘nalishlariga o‘qishga qabul qilish uchun test sinovlari ochiq maydonli binolarda o‘tkazildi.

Imtihonlarni oshkora va shaffof tarzda o‘tkazish maqsadida abituriyentlar binoga kirishda shaxsni identifikatsiyalash qurilmalari yordamida tekshirildi, test sinovlari kuzatuv kameralari yordamida nazorat qilindi. Ushbu jarayonlar abituriyentlarning ota-onalari uchun bevosita katta monitorlarda, Internet tarmog‘i va televideniye orqali to‘g‘ridan to‘g‘rinamoyish qilindi.

Shu bilan birga, sohada amalga oshirilayotgan islohotlarni davom ettirgan holda, oliy ta’lim muassasalariga o‘qishga qabul qilishda o‘tkaziladigan kirish test sinovlarini xalqaro standartlarga muvofiqlashtirish, shuningdek yoshlarning ta’lim olishga bo‘lgan ishtiyoqini rag‘batlantirish maqsadida abituriyentlarning bir nechta bakalavriat ta’lim yo‘nalishlari bo‘yicha tanlovda ishtirok etishlari uchun keng imkoniyatlar yaratish lozim.

Mamlakatimizni yanada rivojlantirish uchun oldimizda turgan ustuvor vazifalarni professional darajada bajarishga qodir yoshlarni tarbiyalash, iqtisodiyot tarmoqlari va ijtimoiy sohani yuqori malakali kadrlar bilan ta’minlash maqsadida, shuningdek 2017 ― 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturiga muvofiq:

  1. O‘zbekiston Respublikasi Vazirlar Mahkamasi huzuridagi Davlat test markazi (keyingi o‘rinlarda — Davlat test markazi), Oliy va o‘rta maxsus ta’lim vazirligi, Xalq ta’limi vazirligi, Moliya vazirligi hamda Iqtisodiyot va sanoat vazirligining quyidagi takliflari ma’qullansin:

2019/2020 o‘quv yili qabulidan boshlab abituriyentlarga oliy ta’lim muassasalarining test sinovi topshiriladigan fanlar majmuasi bir xil bo‘lgan uchtagacha bakalavriat ta’lim yo‘nalishida tanlovda ishtirok etish huquqini berish;

2019/2020 o‘quv yili qabulidan boshlab oliy ta’lim muassasasiga o‘qishga qabul qilish bo‘yicha kirish test sinovlarini iyul-avgust oylarida o‘tkazish;

2020/2021 o‘quv yili qabulidan boshlab test sinovi topshiriladigan fanlar majmuasini ikki bo‘limga ajratib, birinchi bo‘limga barcha test topshiruvchilar uchun majburiy uchta fan — ona tili (o‘zbek, rus yoki qoraqalpoq tili), matematika va O‘zbekiston tarixi, ikkinchi bo‘limga abituriyent tanlagan bakalavriat ta’lim yo‘nalishiga mos ikkita fanni kiritish;

test sinovlari tashkil etilayotgan o‘quv yilidan avvalgi yillarda ta’lim muassasalarini tugatgan abituriyentlardan (nogironligi bo‘lgan yoki to‘liq davlat ta’minotidagi shaxslar bundan mustasno) test sinovlarida ishtirok etishi uchun eng kam ish haqining yarim baravari miqdorida to‘lov undirish;

abituriyentning test sinovida to‘plagan ballari haqidagi ma’lumotni test sinovi o‘tkazilgan kunning ertasiga, uning talabalikka tavsiya etilgani yoki etilmagani bo‘yicha belgilangan tartibda tasdiqlangan tanlov natijasini test sinovlarini o‘tkazish jarayoni to‘liq yakunlangandan keyin bir hafta muddat ichida Davlat test markazining rasmiy veb-saytida e’lon qilish.

  1. Belgilab qo‘yilsinki:

bakalavriat ta’lim yo‘nalishlariga mos test sinovi topshiriladigan fanlar majmuasi, baholash mezonlari, test topshiriqlari soni hamda test sinovlarini o‘tkazishning aniq muddatlari O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi tomonidan belgilanadi;

2019/2020 o‘quv yili qabulidan boshlab O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi tomonidan belgilanadigan davlat oliy ta’lim muassasalariga bakalavriatga o‘qishga kirish uchun abituriyentlar Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali murojaat qiladilar.

  1. Davlat test markazi huzurida yuridik shaxs tashkil etmagan holda Davlat test markazi faoliyatini rivojlantirish jamg‘armasi (keyingi o‘rinlarda — Jamg‘arma) tashkil etilganligi ma’lumot uchun qabul qilinsin.

Quyidagilar Jamg‘armani shakllantirish manbalari etib belgilansin:

oliy ta’lim muassasalarining oshirilgan to‘lov-kontrakt tushumlari (5 foizgacha miqdorda);

Davlat test markazi tomonidan shartnoma bo‘yicha jismoniy va yuridik shaxslarga xizmatlar ko‘rsatishdan tushgan mablag‘lar;

abituriyentlardan test sinovlarida ishtirok etishi uchun undirilgan to‘lovlar;

Jamg‘armaning vaqtincha bo‘sh mablag‘larini joylashtirishdan olinadigan daromadlar;

yuridik va jismoniy shaxslarning homiylik xayriyalari;

xalqaro moliya tashkilotlari va xorijiy davlatlarning grantlari hamda texnik ko‘maklashish mablag‘lari;

qonun hujjatlari bilan taqiqlanmagan boshqa mablag‘lar.

  1. Belgilansinki, Jamg‘armaning mablag‘lari foizdagi ulushi chegaralanmagan holda quyidagi maqsadlarga sarflanadi:

Davlat test markazining moddiy-texnik bazasini mustahkamlash;

Davlat test markazi xodimlarini, shu jumladan xorijiy davlatlarning ilmiy-tadqiqot, ta’lim va boshqa muassasalarida o‘qitish, malakasini oshirish va stajirovka o‘tash;

Davlat test markazining fan nomzodi yoki falsafa doktori (PhD) ilmiy darajasiga yoki xorijiy davlatlarning unga tenglashtirilgan boshqa ilmiy darajalariga ega xodimlarga 30 foiz, fan doktori yoki fan doktori (Doctor of Science) ilmiy darajasiga yoxud xorijiy davlatlarning unga tenglashtirilgan boshqa ilmiy darajalariga ega xodimlarga oylik ish haqining 35 foizi miqdorida ustamalar to‘lab berish;

Davlat test markazi xodimlariga lavozim maoshining 200 foizigacha bo‘lgan miqdorda oylik ustamalar va boshqa rag‘batlantiruvchi to‘lovlarni amalga oshirish;

fuqarolik-huquqiy shartnomalar asosida yuqori malakali mutaxassislarni, shu jumladan xorijiy ekspertlar va xorijda istiqomat qilayotgan vatandoshlarni Davlat test markaziga ishlash uchun jalb etish;

test sinovlari jarayoniga jalb etilgan ishtirokchilarga (bino rahbari va guruh nazoratchilari) ish haqi to‘lash;

test sinovlari o‘tkaziladigan binolarning ijara to‘lovlarini amalga oshirish;

qonun hujjatlarida taqiqlanmagan Davlat test markazi faoliyati bilan bog‘liq boshqa chora-tadbirlar.

  1. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan belgilangan tartibda shakllantiriladigan ro‘yxatlar bo‘yicha, test sinovlari o‘tkaziladigan binolarni jihozlash uchun olib kelinadigan, O‘zbekiston Respublikasida ishlab chiqarilmaydigan uskunalar (shaxsni identifikatsiyalash vositalari, video qayd qilish qurilmalari, barmoq izlarini tekshiruvchi, mobil aloqa to‘lqinini to‘suvchi vositalar, metall detektorlar hamda monitorlar) 2022-yil 1-yanvarga qadar bojxona to‘lovlaridan (bojxona yig‘imlaridan tashqari) ozod qilinsin.
  2. O‘zbekiston Respublikasi Vazirlar Mahkamasi:

mazkur qarorda belgilangan vazifalardan kelib chiqqan holda Davlat test markazining xodimlarning cheklangan soni 186 nafardan iborat bo‘lgan yangilangan tuzilmasini tasdiqlash va uning faoliyatini yanada takomillashtirish to‘g‘risidagi Hukumat qarorini bir oy muddatda qabul qilsin;

Qoraqalpog‘iston Respublikasi, viloyatlar va Toshkent shahar ma’muriy markazlarida Davlat test markazlari hududiy bo‘limlarini joylashtirish va kelgusida test sinovlarini yil davomida o‘tkazish maqsadida yengil konstruksiyali materiallardan katta sig‘imli bino va inshootlarni qurish bo‘yicha bir oy muddatda O‘zbekiston Respublikasi Prezidenti Administratsiyasiga taklif kiritsin.

  1. O‘zbekiston Respublikasi Prezidentining 2017-yil 16-noyabrdagi PQ-3389-son “Respublika oliy ta’lim muassasalari bakalavriatiga kirish test sinovlarini o‘tkazish tartibini takomillashtirish to‘g‘risida”gi qaroriga ilovaga muvofiq o‘zgartirish va qo‘shimchalar kiritilsin.
  2. Davlat test markazi manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
  3. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov va O‘zbekiston Respublikasi Prezidenti maslahatchisi A.A. Abduvaxitov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2019-yil 14-may,

PQ-4319-son

 

O‘zbekiston Respublikasi Prezidentining 2019-yil 14-maydagi PQ-4319-son qaroriga
ILOVA

O‘zbekiston Respublikasi Prezidentining 2017-yil 16-noyabrdagi PQ-3389-son “Respublika oliy ta’lim muassasalari bakalavriatiga kirish test sinovlarini o‘tkazish tartibini takomillashtirish to‘g‘risida”gi qaroriga kiritilayotgan o‘zgartirish va qo‘shimchalar

  1. 1-bandning:

ikkinchi xatboshisidagi “1-avgustdan 15-avgustgacha” so‘zlari “iyul-avgust oylarida” so‘zlari bilan almashtirilsin;

uchinchi xatboshisi quyidagi tahrirda bayon etilsin:

“abituriyentning test sinovidan to‘plagan ballari haqidagi ma’lumotni test sinovi o‘tkazilgan kunning ertasiga, uning talabalikka tavsiya etilgani yoki etilmagani bo‘yicha belgilangan tartibda tasdiqlangan tanlov natijasini test sinovlarini o‘tkazish jarayoni to‘liq yakunlangandan keyin bir hafta muddat ichida Davlat test markazining rasmiy veb-saytida e’lon qilish;”.

  1. 4-bandi quyidagi tahrirda bayon etilsin:

“O‘zbekiston Respublikasi Moliya vazirligi:

test materiallarini tayyorlash va test sinovlari natijalari o‘z vaqtida e’lon qilinishini ta’minlash maqsadida Davlat test markaziga zamonaviy moddiy-texnik vositalar va jihozlar xarid qilish uchun 2018-yildan boshlab O‘zbekiston Respublikasi Davlat budjetidan zarur mablag‘lar ajratilishini nazarda tutsin;

Davlat test markazining budjetdan tashqari mablag‘lari hamda oliy ta’lim muassasalarining oshirilgan to‘lov-kontrakt tushumlari (5 foizgacha miqdorda) hisobiga bir oy muddatda Davlat test markazi huzurida Davlat test markazi faoliyatini rivojlantirish jamg‘armasini tashkil etsin”.