YANGILIKLAR

Oy: Noyabr 2018

Toshkent davlat iqtisodiyot universitetiga O‘zbekistonning «2019-2021 yillarga mo‘ljallangan tizimli islohotlar asosiy yo‘nalishlarining yo‘l xaritasi» taqdimotiga bag‘ishlangan tadbirda xalqaro ekspert sifatida ishtirok etayotgan Adolfa Ibanes universiteti professori Eduardo Bitran tashrif buyurdi.

 

 

Tashrif avvalida Chililik ekspert universitetdagi o‘quv jarayonlari, dars berish uslublari, o‘quv auditoriyalari va laboratoriyalari, ta’lim beruvchilar va ilm o‘rganuvchilar uchun yaratilgan sharoitlar bilan yaqindan tanishdi. Talabalar va professor-o‘qituvchilar bilan suhbatlashib, ta’lim dargohining imkoniyatlari keng ekanligini e’tirof etdi. Ilmiy salohiyatli mutaxassislar har bir davr va davlatda jamiyatni farovonlikka, barcha sohalarni rivojlantirishga yetaklovchi kuch bo‘lishini aytib, bu yo‘lda talabalar va universitet pedagog jamoasiga ulkan muvaffaqiyat tiladi.

 

 

 

Shundan so‘ng, universitet huzuridagi O‘zbekiston iqtisodiyotini rivojlantirishning ilmiy asoslari va muammolari ilmiy tadqiqot markazi ilmiy xodimlari, professor-o‘qituvchilar, talabalar, ilmiy izlanuvchilar va tadqiqotchilar ishtirokida davra suhbati bo‘lib o‘tdi. Janob Eduardo Bitran “Infrastruktura xizmatlari samaradorligini ta’minlash” (“Efficient Provision of Infrastructure Services”) mavzusida ma’ruza qildi. U o‘z ma’ruzasida o‘tish davrida iqtisodiyotni rivojlantirish, aholi bandligini ta’minlash, mehnat resurslaridan samarali foydalanish, ilmiy izlanishlar va tadqiqotlarni amaliyotda qo‘llash, aholining farovonlik darajasini oshirish bo‘yicha Chili davlati tajribasi xususida to‘xtalib o‘tdi. Shuningdek, O‘zbekistonda ayni kunlarda amalga oshirilayotgan keng qamrovli islohotlarning yo‘l xaritasi, iqtisodiy islohotlarning hozirgi holati va ustuvor yo‘nalishlarini amalga oshirish mexanizmlari to‘g‘risida o‘z fikrlarini bildirib o‘tdi.

 

 

Ishtirokchilar yurtimizdagi islohotlarning xorijliklar nigohida qanday gavdalanayotgani va ma’ruza yuzasidan o‘zlarini qiziqtirgan savollarga atroflicha ma’lumot oldilar.

Tadbir so‘ngida Adolfa Ibanes universiteti professori Eduardo Bitranga amaliy tashrif uchun tashakkur bildirilib, kelgusida ham shu kabi tadbirlarni hamkorlikda o‘tkazish bo‘yicha taklif berildi.

Eslatib o‘tamiz, mamlakatimizda Iqtisodiyot, Moliya vazirligi hamda Jahon bankining ishchi guruhi bilan birgalikda tarkibiy o‘zgarishlar va iqtisodiy islohotlarni amalga oshirish maqsadida beshta asosiy yo‘nalishni o‘z ichiga olgan «islohotlar yo‘l xaritasi» ishlab chiqilgan.

2018-yil 13-14-noyabr kunlari Ashxabodda “Kuchli va baxtli bo‘lish davrida ta’lim va sport” mavzusida xalqaro ilmiy-amaliy konferentsiya bo‘lib o‘tdi. Mazkur tadbirda Turkmaniston Xalq ta’limi vazirligining taklifiga binoan Xalqaro turizm fakulteti dekani Abror Kucharov ishtirok etdi.

 

 

Ta’lim va tarbiya islohotlariga bag‘ishlangan ushbu xalqaro ilmiy konferensiyada Abror Kucharov “Oliy ta’lim muassasasini strategik boshqarish» mavzusida ma’ruza qildi.

 

 

Eslatib o‘tamiz ushbu xalqaro ilmiy konferentsiyada dunyoning 60dan ortiq universitetlarining vakillari va olimlari ishtirok etdilar.

Toshkent davlat iqtisodiyot universiteti Magistratura bo‘limi tomonidan «O‘zbekistonda raqamli iqtisodiyotni rivojlantirish yo‘llari» mavzusida ilmiy-amaliy seminar tashkil etildi.

 

 

Tadbirni Ilmiy ishlar va innovatsiyalar bo‘yicha prorektori Sherzod Mustafaqulov kirish so‘zi bilan ochib berdi.

Ilmiy-amaliy seminarda Magistraturaning 2-bosqich talabalari Jasur Qo‘shmanov «Elektron savdoda biznes muhiti«, Jasur Turg‘unov «Ijtimoiy tadbirkorlik va aqlli kontentlar«, Elshod Umarov «Elektron marketing (globallashuv)« mavzusidagi ma’ruzalar bilan ishtirok etdi.

 

 

Seminarda muhokama qilingan mavzular yuzasidan ishtirokchilar o‘zlarini qiziqtirgan savollar bilan ma’ruzachilarga murojaat qilishdi va atroflicha ma’lumotga ega bo‘ldilar.

 

 

Ma’lumot o‘rnida aytish kerakki, ma’ruza bilan ishtirok etgan talabalar Keymyung (Keimyung) hamda Toshkent davlat iqtisodiyot universiteti o‘rtasida imzolangan memorandum asosida Janubiy Koreyada tashkil etilgan “Raqamli iqtisodiyot” nomli malaka oshirish darslarida tahsil olishgan.

 

2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasiga muvofiq ishlab chiqilayotgan maqsadli dasturlar mamlakatimiz aholisining hayot mamlakatimiz aholisining hayotdarajasi va sifatini yanada oshirishni ta’minlashga qaratilgan. Bu dasturlarni amaliyotga tatbiq etishda avvalo, iqtisodiyotning fundamental asosini tashkil etuvchi marketing tizimidan yuqori saviyada foydalangandagina o‘z samarasini beradi.

 

 

Bugungi kundagi innovatsion va raqamli iqtisodiyot davrida marketing tizimida katta o‘zgarishlar kuzatilmoqda. Soha mutaxassislari “yangi iqtisodiyot” sharoitida korxonalar marketing maqsadlari va usullari haqidagi tasavvurlarini qayta ko‘rib chiqishlari lozim demoqdalar. Marketingning kechagi yutuqli strategiyalari bugun o‘z dolzarbligini yo‘qotmoqda.

Bozor muhitidagi doimiy o‘zgarishlar?marketing uchun xavf-xatar emas, uning hayotiga aylanmoqda. Bu esa o‘z navbatida mamlakatimizda ishlab chiqarilayotgan milliy tovarlar raqobatbardoshligini oshirishda zamonaviy marketing konsepsiyalaridan samarali foydalanishni taqazo etmoqda.

Shu sohada mavjud bo‘lgan muammolarni o‘rganish va ularni hal etish bo‘yicha ilmiy-amaliy taklif va tavsiyalar ishlab chiqish maqsadida Toshkent davlat iqtisodiyot universitetining Marketing kafedrasi tomonidan “Milliy tovarlar raqobatbardoshligini oshirishda zamonaviy marketing konsepsiyalaridan foydalanish” mavzuidagi Respublika ilmiy-amaliy konferensiyasi tashkil etildi.

 

 

Mazkur konferensiyada zamonaviy marketing tizimi asosida milliy tovarlar raqobatbardoshligini oshirish, ichki va tashqi bozorlarni iste’mol tovarlari bilan to‘ldirishda innovatsion marketing strategiyalaridan foydalanish, kichik sanoat zonalarini tashkil etishda marketing tadqiqotlari o‘tkazish, eksportbop tayyor mahsulotlar ishlab chiqarishda zamonaviy marketing konsepsiyalaridan foydalanishni takomillashtirishkabi masalalar muhokama qilinadi.

Ilmiy-amaliy konferensiyanio‘tkazish uchun asos bo‘lib, O‘zbekiston Respublikasi Prezidenti farmonlari, qarorlari, Vazirlar Mahkamasi qarorlari, farmoyishlari va boshqa harakatdagi me’yoriy hujjatlar hisoblanadi.

 

Konferensiyaning ilmiy yo‘nalishi, maqsadi va vazifalari

Milliy tovarlar raqobatbardoshligini oshirishda zamonaviy marketing konsepsiyalaridan foydalanishborasidagi muammolarni o‘rganish konferensiyaning ilmiy yo‘nalishibo‘lib hisoblanadi. Konferensiyaning maqsadi marketing tizimi asosida bozorni o‘rganish, tashqi bozorlarga chiqish, uning asnosida xalqaro munosabatlarni o‘rnatish hamda eksportbop mahsulot ishlab chiqarishbo‘yicha zamonaviy marketing faoliyatini takomillashtirish va samaradorligini oshirishning ustuvor yo‘nalishlari borasida fikr almashish, mushohada yuritish, ilmiy-amaliy taklif va tavsiyalar ishlab chiqishdan iborat.

 

Muhokama qilinadigan masalalar:

zamonaviy marketing konsepsiyalaridan foydalanishning nazariy, uslubiy va amaliy masalalari;

milliy tovarlar raqobatbardoshligini oshirishda marketing tadqiqotlaridan foydalanish yo‘llari;

milliy tovarlar raqobatbardoshligini oshirish bo‘yicha marketing strategiyalarini ishlab chiqish;

ichki va tashqi bozorlarda tovarlar raqobatbardoshligini oshirish bo‘yicha innovatsion marketing strategiyalarini ishlab chiqish.

 

Konferensiyadan kutilayotgan natija

Konferensiyadan kutilayotgan ilmiy-amaliy natija zamonaviy marketing konsepsiyalaridan foydalanishning nazariy, uslubiy va amaliy masalalari, milliy tovarlar raqobatbardoshligini oshirishda marketing tadqiqotlaridan foydalanish yo‘llari, milliy tovarlar raqobatbardoshligini oshirish bo‘yicha marketing strategiyalarini ishlab chiqish, ichki va tashqi bozorlarda tovarlar raqobatbardoshligini oshirish bo‘yicha innovatsion marketing strategiyalarini ishlab chiqishborasida ilmiy asoslangan taklif va tavsiyalar ishlab chiqishdan iborat.

 

Konferensiyadan kutilayotgan ijtimoiy natija

Milliy tovarlar raqobatbardoshligini oshirishda zamonaviy marketing konsepsiyalaridan foydalanishborasida ishlab chiqilgan ilmiy taklif hamda amaliy tavsiyalar mamlakatimizdagi ishlab chiqarish va xizmat ko‘rsatish korxonalari salohiyatini yanada oshirishga, korxonalarda to‘laqonli raqobat muhitini rivojlantirishga, mamlakat aholisining iste’mol tovarlari va xizmatlariga bo‘lgan talabini yanada to‘laroq qondirishga hamda ularni turmush farovonligini oshirishgaxizmat qiladi.

 

Respublika ilmiy-amaliy konferensiyasi taqdimotlari:

👉 NOXALOL REKLAMA qonunchilik, amaliyot va iste’molchilar huquqlarini himoya qilish

👉 Стратегия развития отрасли на период 2019-2021 годы

👉 Международный маркетинг Российских малых и средних инновационных предприятий

👉 Перспективы сотрудничества в пищевой отрасли

2018-yil 24-noyabr kuni Toshkent davlat iqtisodiyot universitetida Jahon iqtisodiyoti kafedrasi professor-o‘qituvchilari va innovatsion-korporativ hamkorlik tashkilotlarining vakillari ishtirokida ilmiy-amaliy seminar bo‘lib o‘tdi.

 

 

“O‘zbekiston Respublikasida tashqi sektorning rivojlanishi: muammolar, yechimlar va istiqbollar” mavzusidagi mazkur seminarda O‘zbekiston Respublikasi Investitsiyalar bo‘yicha davlat qo‘mitasi, Savdo-sanoat palatasi, Davlat bojxona qo‘imtasi vakillari, “Buyuk ipak yo‘li deklarant xizmati” kompaniyasi mutaxassislari hamda Jahon iqtisodiyoti kafedrasi ilmiy izlanuvchilari ma’ruza qildilar.

 

 

Ilmiy-amaliy seminarda taqdimot bilan chiqish qilganlar O‘zbekistonning bugungi rivojlanish holatida tashqi sektorning tutgan o‘rni, tadbirkorlik, investitsiya va tashqi iqtisodiy faoliyatni takomillashtirishning tashqi sektor bilan bog‘liq jihatlari: omillari, muammolari, infratuzilmaviy holati va xalqaro hamkorlik masalalarining ilmiy-nazariy asoslari, amaliy yechimlari hamda samaralari bo‘yicha ma’ruza qildilar.

 

 

Ilmiy-amaliy seminarda ishtirok etgan talabalar va professor-o‘qituvchilar tomonidan o‘zini qiziqtirgan masalalar bo‘yicha berilgan savollarga ma’ruzachilar asosli, o‘rinli va to‘laqonli javoblari bilan o‘z fikr-mulohazalarini bildirdilar.

 

 

Seminar mazmunli, bahs-munozalarga boy, sohadagi mavjud muammolar yechimiga doir ishlab chiqilgan taklif-tavsiyalarning muhimligi va ilmiy-amaliy ahamiyati yuqoriligi bilan samarali o‘tdi.

 

Ilmiy-amaliy seminarda mavzular bo‘yicha qilingan taqdimotlar bilan quyida tanishishingiz mumkin:

O‘zbekiston Respublikasiga xorijiy investitsiyalarni jalb qilish va investitsiya muhitini yaxshilash bo‘yicha amalga oshirilayotgan chora-tadbirlar

Вовлечение государств – участников СНГ, не являющихся членами ЕАЭС, в евразийскую интеграцию

Совершенствование таможенной инфраструктуры как фактор развития внешнеэкономической деятельности Республики Узбекистан

Bugun, 24-noyabr kuni Toshkent davlat iqtisodiyoot universitetiga Gunadarma universiteti rektori Eko Sri Margianti boshchiligidagi Indoneziyaning bir qator oliy ta’lim muassasalari rahbarlari, ilmiy xodimlari, pedagoglaridan iborat delegatsiya tashrif buyurdi.

 

Delegatsiya a’zolari tashrif avvalida, universitetning tashkiliy tuzilmasi, o‘quv-amaliyot laborotoriyalari, ta’lim berish jarayonlari, pedagog xodimlar va talabalar uchun yaratilgan sharoitlar bilan yaqindan tanishdilar.

Ta’kidlash joizki, bugungi kunda Toshkent davlat iqtisodiyot universiteti Indoneziyaning 7 ta oliy ta’lim muassasasi bilan o‘zaro aloqalar o‘rnatgan. Shuningdek, xalqaro ilmiy-amaliy anjumanlar, forumlar doirasida hamkorlik qilib kelinmoqda, professor-o‘qituvchilar almashinuvi bo‘yicha amaliy ishlar yo‘lga qo‘yildi.

 

 

O‘zbekiston va Indoneziya oliy ta’lim muassasalari vakillari ishtirokida bo‘lib o‘tgan uchrashuvda “O‘zbekistonda olib borilayotgan iqtisodiy islohotlar”, “O‘zbekiston turizmining istiqbollari”, “Indoneziyaning turizm salohiyati”, “Indoneziyada ta’lim olish imkoniyatlari va hamkorlikda loyihalarni amalga oshirish” mavzusidagi taqdimotlar qilindi.

 

 

Muzokaralar jarayonida ikki davlatning turizm salohiyatini yanada oshirish borasida ilmiy hamkorlik qilish masalalari muhokama qilindi.

— Biz, Imom al-Buxoriyni yetishtirib bergan zaminda bo‘lib turganimizdan mamnunmiz. Islom dunyosida yuksak meros qoldirgan yurtingizdagi ulug‘ zotlar qadamjolarini ziyorat qilish qalbimizda g‘urur-iftixor qoldiradi. Mazkur yo‘nalishda turizm sohasini rivojlantirish borasida ilmiy-amaliy hamkorlik qilish har ikki davlat rivojiga qo‘shilgan hissa bo‘lar edi, deydi Samawa universiteti rektori Sayfuddin Iskandar.

 

 

O‘zaro muloqotlardan so‘ng Toshkent davlat iqtisodiyot universiteti hamda Indoneziyaning Stmik Jabar, Al-Chifari, Majalengka, Samawa, Teknokrat, Sebelas Maret universitetlari bilan ta’lim, hamkorlikda ilmiy tadqiqot ishlarini olib borish, talabalar va professor-o‘qituvchilar almashinuvini yo‘lga qo‘yish maqsadida o‘zaro kelushuv memorandumlari imzolandi.

 

Bugun, 23-noyabr kuni Toshkent davlat iqtisodiyot universitetining Iqtisodiyot, Buxgalteriya hisobi va audit, Iqtisodiyotda axborot tizimlari, Korporativ boshqaruv hamda Xalqaro turizm fakultetlarida tahsil olayotgan 500 nafardan ortiq talaba professor-o‘qituvchilar, ta’lim-tarbiya maslahatchilari hamrohligida O‘zbekiston tarixi davlat muzeyiga tashrif buyurdilar.

 

 

Har qanday mamlakat davlat taraqqiyotga intilar ekan, avvalo tarixga nazar tashlab, mavjud tajriba, urf-odat va an’analar hamda qadimiy yodgorliklarni o‘rganishga, ularni saqlashga intiladi. Bu borada esa muzeylarning o‘rni beqiyos. Chunki ular o‘tmishdan kelgan ma’naviyat, madaniyat, ma’rifat, tabiat yodgorliklarining yaxlit tizimga solingan yig‘indisi bo‘lib, amaldagi qonun-qoidaga muvofiq saqlanadi va namoyish qilinadi.

 

 

Shu bilan bir qatorda muzeylar – fuqarolar, ayniqsa, yoshlarda tarixiy xotira va milliy qadriyatlarni e’zozlash hislatlarini shakllantirish, ulardagi vatanparvarlik, fidoyilik, yurt kelajagiga daxldorlik fazilatlarini, umuman, ma’naviyatini boyitishga xizmat qiladi.

 

 

Oliy va o‘rta maxsus ta’lim vazirligi hamda O‘zbekiston yoshlar ittifoqi tomonidan aynan mana shu jihatga alohida e’tibor qaratilgan holda o‘quvchi va talaba yoshlarni muzeylarga jalb qilish bo‘yicha tizimli ishlar amalga oshirilmoqda. Jumladan, har haftaning juma kuni — muzeylar kuni aksiyasini o‘tkazish yo‘lga qo‘yildi. Toshkent shahridagi oliy ta’lim muassasalari talaba-yoshlarining darsdan bo‘sh vaqtlarini mazmunli tashkil etish, ularning yurtimiz tarixiga qiziqishini kuchaytirish, tariximizga doir bilimlarini yanada oshirish maqsadida shahardagi muzeylarga navbat bilan bepul tashrifi tashkil etilmoqda. Ijtimoiy aksiyaga ko‘ra maxsus reja-jadval tasdiqlangan bo‘lib, unga ko‘ra joriy yilning noyabr oyidan boshlab 2020-yilning aprel oyigacha bo‘lgan davrda talabalarni muzeylarga jalb etish ishlari amalga oshirilishi belgilangan.

 

 

Oliy va o‘rta maxsus ta’lim vazirligi tomonidan O‘zbekiston yoshlar ittifoqi bilan hamkorlikda tashkil etilgan mazkur ijtimoiy aksiya doirasida O‘zbekiston tarixi davlat muzeyi bugun talaba-yoshlar bilan bag‘rini to‘ldirdi.

Talabalar muzeyda eksponatlarni tomosha qilish bilan bir vaqtda O‘zbekiston tarixi haqida qiziqarli ma’ruzalar tinglashdi va zamonaviy texnologiyalar asosida tayyorlangan muzey o‘yinlarini o‘ynab, madaniy dam oldilar.

 

 

Talabalarning bugungi tashrifi doimgilaridan shunisi bilan farq qiladiki, ular mazkur tadbir natijasidagi xulosalari asosida ijodiy ishlar yozadilar va eng yaxshi ijod namunasi egalari O‘zbekiston yoshlar ittifoqi va vazirlikning sovg‘alari bilan taqdirlanadilar.

Bundan ko‘zlangan asosiy maqsad, yoshlarning ma’naviy dunyoqarashini kengaytirish, ularni yurtimizning shonli tarixiga va Vatanimiz ravnaqiga hissa qo‘shish, mamlakat kelajagiga daxldorlik ruhida tarbiyalash hamda buyuk ajdodlarimizga munosib avlodlar bo‘lib yetishishga bo‘lgan intilishlarini yanada kuchaytirishga erishishdan iborat.

Bu kabi tadbirlar Toshkent shahridagi boshqa muzeylarda ham davom etmoqda.

“Scopus” ilmiy-tahliliy ma’lumotlar bazasi versiyasi bo‘yicha Ilm rivojiga qo‘shgan hissasi (“Contribution to Science”) uchun nominatsiyasi bo‘yicha Toshkent davlat iqtisodiyot universiteti taqdirlandi.

Oliy va o‘rta maxsus ta’lim vazirligi Niderlandiyaning ilm-fanga ixtisoslashgan Elsevier nashriyot kompaniyasi bilan birgalikda dunyoning yirik ilmiy-tahliliy ma’lumotlar bazasi bo‘lgan Scopus statiskasi bo‘yicha samarali faoliyat yuritayotgan o‘zbekistonlik yetakchi olimlarning nomlarini e’lon qildi.

Taqdirlash marosimi shu yilning 23 noyabr kuni Toshkent davlat iqtisodiyot universitetida tashkil etilib, unda vazirlik va tashkilotlar rahbarlari, QS, Times Higher Education kabi dunyoning yetakchi reyting agentliklari vakillari, Elsevier kompaniyasi mutaxassislari, xorijlik ekspertlar hamda oliy ta’lim muassasalari rektorlari, prorektorlari va doktorantlar ishtirok etdi.

«Scopus Award-2018» taqdirlash marosimida yil davomida ilmiy-tadqiqot faoliyat bilan shug‘ullangan o‘zbekistonlik olimlar o‘rtasida to‘qqizta nominatsiya bo‘yicha g‘oliblar aniqlandi.

Har bir izlanuvchining ilm-fan ravnaqiga qo‘shgan hissasi taqriz qilinayotgan ilmiy adabiyotlar annotatsiyasi va iqtiboslarining eng yirik yagona bazasi bo‘lgan Scopus ma’lumotlari asosida amalga oshirilib, «Ilm-fan-2020» milliy dasturi doirasida 2018 yilda unga O‘zbekistonning yuzdan ortiq ilmiy-tadqiqot institutlari va oliy ta’lim muassasalari ulanish imkonini qo‘lga kiritishdi.

Taqdimotda o‘zbekistonlik olimlar tomonidan amalga oshirilayotgan tadqiqotlarning sifati hamda jahondagi iqtiboslari jihatidan nufuzli o‘ntalikka kirgan jurnallarda chop etilgan maqolalari soni ancha oshganligi e’tirof etildi.

Scopus Award mukofoti – jahoning nufuzli ilmiy mukofoti hisoblanib, Elsevier kompaniyasining dunyo miqyosidagi tashabbusi sanaladi. Mukofot olimlarning sermahsul faoliyatini rag‘batlantirish, ziyolilar mavqyeni ko‘tarish hamda yoshlar o‘rtasida ilmiy faoliyat bilan professional shug‘ullanishni ommalashtirishga yo‘naltirilgan.

Olimlarning ilmiy faoliyati tabaqalashtirilgan baho bo‘yicha OESR klasssifikatsiyasini qo‘llagan holda ochiqlik prinsipi asosida baholandi.

“SCOPUS AWARD-2018” taqdirlanganlar:

“Researcher of the Year” («Yil olimi») nominatsiyasi – Dilshod To‘laganov (Toshkent shahridagi Turin politexnika universiteti), Temurbek Usmonov, Bobomurod Ahmedov (O‘zbekiston Fanlar akademiyasi);

“High Performance award” (Eng sermahsul OTM) nominatsiyasi – O‘zbekiston Milliy universiteti;

“Outstanding Research Impact Award” (Tadqiqotlarda erishgan ulkan natijasi uchun) nominatsiyasi – O‘zbekiston Fanlar akademiyasi;

“Growth of the Year” (Yilning eng muvaffqiyatga erishgan OTM) nominatsiyasi – Tashkent pediatriya tibbiyot instituti;

“Breakthrough of the Year” (Yil kashfiyoti) nominatsiyasi – Toshkent irrigatsiya va qishloq xo‘jaligini mexanizatsiyalash muhandislari instituti;

“Library of the Year” (Yil kutubxonasi) nominatsiyasi – Samarqand davlat universiteti;

“Contribution to Science” (Ilm rivojiga qo‘shgan hissasi uchun) nominatsiyasi – Toshkent davlat iqtisodiyot universiteti;

Eng yosh olim” nominatsiyasi – Mirabbos Xo‘jamberdiyev;

“Women in Science” (Yil olimasi) nominatsiyasi – Shaxlo Turdiqulova.

Taqdirlash marosimida oltita fan kategoriyalarida ham eng yaxshi mualliflar aniqlandi: Ibrohim Abdurahmonov (qishloq xo‘jaligi), Olim Ro‘zimurodov (injiniring va texnologiya), Raufxon Salaxodjayev (gumanitar fanlar), Ulug‘bek Abdufattoyev (tibbiyot), Bahrom Umirov (tabiiy fanlar), Xegay Tatyana (ijtimoiy fanlari).

Tadbir doirasida Birinchi ilmiy forum ham o‘tkazildi. Unda maqola yozish, ilmiy jurnallarni indeksatsiyalash va xalqaro reytinglarga kirish metodologiyasini o‘rgatish bo‘yicha mahorat darslari bo‘lib o‘tdi.

Ma’lumot uchun, shu yilning 23-mart kuni Oliy va o‘rta maxsus ta’lim vazirligi hamda Elsevier kompaniyasi o‘rtasida respublika oliy ta’lim muassasalarining ilmiy salohiyatini oshirish, ularni dunyoning yetakchi reyting agentliklari tomonidan e’tirof etilishini ta’minlashga qaratilgan «Ilm-fan 2020» hamkorlik dasturi imzolangan.

 

Birinchi ilmiy forum taqdimotlari:

Bepress – The future of the Insitutional Repository and the Journal Management and Publishing Platforms

Business Insight Solutions (BIS)

Increased Recognition, More Funding & Higher Ranks

Xalqaro turizm fakulteti hamda Turizm va servis kafedrasi tomonidan “Harakatlar strategiyasi ijrosi doirasida turizm sohasida amalga oshirilayotgan islohotlarning ijtimoiy-iqtisodiy samaralari” mavzusidagi davra suhbati o‘tkazildi. Tadbirda Xalqaro turizm fakulteti professor-o‘qituvchilari hamda talabalari ishtirok etdi.

 

 

“O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi O‘zbekiston Respublikasi Prezidentining 2017-yil 7-fevralda tasdiqlangan farmoni ijrosini ta’minlash maqsadida tashkil etilgan davra suhbatida yetakchi ekspertlar tomonidan mazkur hujjatning amaliy ahamiyati yig‘ilganlarga aniq misollar yordamida tushuntirib berildi. Xususan, O‘zbekiston Xalq demokratik partiyasi Markaziy Kengashi Yoshlarning ijtimoiy-siyosiy faolligini oshirish sektori mudiri Umrbek Bektemirov tomonidan Harakatlar strategiyasi ijrosi doirasida turizm sohasida amalga oshirilayotgan islohotlarning ijtimoiy samaralari ko‘rsatib berildi.

 

 

Davra suhbati interfaol tarzda davom etdi. Jumladan, viktorina savollari asosida talabalarning mavzuga oid bilimlari sinovdan o‘tdi. Mavzu muhokamalari va viktorinada munosib qatnashgan talabalarga tashkilotchilar tomonidan sertifikatlar taqdim etildi.

Universitet kafedralari tomonidan innovatsion-korporativ hamkorlik doirasida ilmiy-amaliy seminarlar tashkil etilishi rejasiga muvofiq, 2018-yil 22-noyabr kuni Mehnat iqtisodiyoti va sotsialogiyasi kafedrasi tomonidan “Ta’lim va ishlab chiqarish integratsiyasida kadrlar tayyorlashning dolzarb masalalari” mavzusidagi ilmiy-amaliy seminar o‘tkazildi.

 

 

Tadbirni Ilmiy ishlar va innovatsiyalar bo‘yicha prorektor Sherzod Mustafaqulov kirish so‘zi bilan ochib berdi va seminar ishiga muvaffaqiyat tiladi.

 

 

2017-2021 yillarga mo‘ljallangan Harakatlar strategiyasi asosida olib borilayotgan islohotlar samarasini yanada oshirish, davlat va jamiyatning har tomonlama rivojlanishi uchun shart-sharoitlar yaratish hamda hayotning barcha sohalarini liberallashtirish bo‘yicha ustuvor yo‘nalishlardan kelib chiqib, seminarda asosiy e’tibor mamlakat iqtisodiyotini barqaror rivojlantirish bilan bog‘liq vazifalarni hal etishda korxona va tashkilotlarni malakali kadrlar bilan ta’minlashda mavjud bo‘lgan muammolarni bartaraf etish masalalariga qaratildi.

 

 

Seminarda “O‘zbekiston Respublikasida yoshlarni ish bilan ta’minlashni takomillashtirish yo‘llari”, “Mehnat bozorida yoshlarning faollik darajasini oshirish”, “Davlat korxonalarida kadrlar siyosati”, “O‘zbekistonda fan va ta’lim integratsiyasini rivojlantirish yo‘llari”, “G‘alla Alteg”, “G‘alla alteg” AJda yosh kadrlarni ish joylariga moslashtirish masalalari”, “Korxonada kadrlar zaxirasini shakllantirish va takomillashtirish istiqbollari”, “Tijorat banklarining oliy o‘quv yurtlari bilan hamkorligini mustahkamlash masalalari”, “Mehnat migratsiyasi masalalari bilan shug‘ullanuvchi mutaxassilarga qo‘yiladigan talablar”, “FABIENNE INTER GROUP” qo‘shma korxonasida kadrlarni boshqarish tizimi”, “Demografik jarayonlarnnig ta’lim tizimiga ta’siri”, “Oliy ta’lim muassasalari bitiruvchilarini ishga joylashtirishning dolzarb masalalari” kabi ma’ruzalar tinglandi.
Anjumanda qabul qilingan qaror va tavsiyanomalardan foydalanish orqali mamlakatimizda ta’lim-ishlab chiqarish integratsiyasida kadrlar tayyorlashning dolzarb masalalarini samarali hal etish yo‘nalishlari bo‘yicha tadbirlar ishlab chiqishda asos bo‘lib hizmat qiladi.

 

 

Ilmiy seminar ishtirokchilari tavsiyalariga ko‘ra kelgusida o‘tkazilishi rejalashtirilayotgan ilmiy-amaliy seminarlarni tarmoq va sohalar kesimida faoliyat ko‘rsatayotgan korxona va tashkilotlar bilan muammoli mavzular doirasida o‘tkazishga qaror qilindi.

 

 

Seminarda O‘zbekiston Respublikasi Bandlik va mehnat munosabatlari vazirligi, Iqtisodiyot vazirligi, “G‘alla Alteg” AJ, “Toshkentdonmahsulotlari” AJ, “Mikrokreditbank” ATB Toshkent viloyat filiali, Tashqi mehnat migratsiyasi masalalari Agentligi, “FABIENNE INTER GROUP” qo‘shma korxonasi mutaxasisislari, TDIU huzuridagi ilmiy-tadqiqot markazi olimlari, hamda boshqa oliy o‘quv yurtlarining professor-o‘qituvchilari, ilmiy tadqiqotchilari va talabalari ishtirok etishdi.