YANGILIKLAR

Bo'lim: Tadbirlar

Тошкент давлат иқтисодиёт университети ҳамда Давлат хизматини ривожлантириш агентлиги ҳамкорлигида очиқ мулоқот ўтказилди. Унда Агентликнинг марказий ва ҳудудий органлари масъул ходимлари, иш берувчи корхона ва ташкилотларнинг ходимлар билан ишловчи раҳбар ходимлари, университет раҳбарияти, профессор-ўқитувчилар ва талабалар иштирок этди.

Таъкидландики, мамлакатимизни ижтимоий-иқтисодий ривожлантириш бўйича устувор вазифаларга мувофиқ кадрлар тайёрлашнинг мазмунини тубдан қайта кўриб чиқиш, халқаро стандартлар даражасида олий маълумотли мутахассислар тайёрлашга зарур шарт-шароитлар яратиш мақсадларини амалга оширишга алоҳида эътибор қаратилиб келинмоқда.

Айниқса, давлат бошқаруви учун истиқболли кадрлар захирасини шакллантиришда ёшларни ватанпарварлик руҳида тарбиялаш, замонавий бошқарув тамойилларини пухта эгаллаши учун шарт-шароитлар яратиб бериш ҳамда уларнинг етакчилик қобилиятини шакллантириш орқали рақобатбардош ва малакали кадрлар тайёрлаш бугунги куннинг долзарб масалаларидан бири ҳисобланади.

Шу билан бирга, иқтидорли ёшларни тизимли қўллаб-қувватлаш, уларни мутахассислиги бўйича касбга йўналтириш, шунингдек, битирувчилар бандлигини таъминлаш ҳамда мониторинг қилиш йўналишида амалга оширилаётган ишлар ҳам ўзининг долзарблиги билан аҳамиятлидир.

Ушбу тадбирдан кўзланган асосий мақсад Тошкент давлат иқтисодиёт университети талабалари ва битирувчиларининг етакчилик, тадбиркорлик борасидаги қобилиятини алоҳида интервьюлар уюштириш ва уларнинг фикр-мулоҳазаларини умумлаштириш орқали ўрганиш, иш берувчи ташкилотларнинг кадрлар хизматлари билан мавжуд муаммоларни аниқлаш ҳамда уларнинг ечими бўйича ҳамкорликдаги тизимли фаолиятни йўлга қўйишдан иборат.

Очиқ мулоқот сўнгида Тошкент давлат иқтисодиёт университети ва Ўзбекистон Республикаси Президенти ҳузуридаги Давлат хизматини ривожлантириш агентлиги ўртасида ҳамкорлик меморандуми имзоланди. Ушбу келишув ўз ичига Агентлик салоҳиятидан университетда янги авлод кадрларини мақсадли тайёрлашда фойдаланиш, иқтидорли ёшлар билан ишлаш тизимини такомиллаштириш, уларни қўллаб-қувватлаш, битирувчиларни ўз мутахассисликлари бўйича бандлигини таъминлашга янгича ёндошиш, замонавий таълим дастурлари яратиш, шунингдек бошқарув, инсон ресурсларини бошқариш, кадрлар салоҳиятини ошириш йўналишларида методик ёрдам кўрсатиш, амалиёт ва стажировкалар ташкил этиш, инновацион илмий тадқиқотларга оид фаолиятни такомиллаштириш мақсадларини қамраб олган.

 

 

ТДИУ ахборот хизмати

Бугун, бутун юртимиз бўйлаб Ўзбек тили байрами кенг нишонланди. Жумладан, пойтахтимиздаги Адиблар хиёбонида 21 октябрь – Ўзбек тили байрами муносабати билан турли вазирлик ва идоралар, ижодий ва жамоат ташкилотларнинг вакиллари, ижодкор зиёлилар, маънавият фидойилари, ўқитувчилар, талаба-ёшлар иштирокида байрам тадбирлари бўлиб ўтди. Тошкент давлат иқтисодиёт университети жамоаси ҳам мазкур шукуҳли тадбирда иштирок этиб, Алишер Навоий ҳамда Муҳаммад Аминхўжа Мирзахўжа ўғли Муқимий ҳайкали пойига гуллар қўйдилар.
Ташкил этилган байрам тадбирида Тошкент давлат иқтисодиёт университети ректори Қўнғиротбой Шарипов, Ўзбекистон халқ артисти, Муқимий номидаги ўзбек давлат мусиқали драма театри директори Мирза Азизов, Республика Маънавият ва маърифат маркази раисининг биринчи ўринбосари Муҳаммаджон Қуронов ва бошқалар мамлакатимизда она тилимизнинг нуфузи ва мавқеини янада юксалтириш борасидаги эзгу ташаббуслар, улуғ аждодларимизнинг ибратли ҳаёти ва ижодини ўрганишнинг аҳамияти ҳақида сўз юритдилар. Учинчи Ренессанс даврига қадам қўйиш палласида ўзбек тилининг ўрни ва аҳамияти хусусида фикр билдирдилар. Муқимий ижодини ўрганиш ва тарғиб қилиш борасида олиб борилаётган кенг қамровли ишлар ҳақида гапириб бердилар.
Тадбир давомида Тошкент давлат иқтисодиёт университети қошидаги Академик лицей ўқувчилари, университет талабалари томонидан адибларимиз, жумладан Муқимий асарлари асосида чиқишлар амалга оширдилар, шеърлар ижро қилиб, қўшиқлар куйладилар. Таълим даргоҳимизда таҳсил олаётган хорижий тилли ўқувчи ва талабаларнинг чиқишлари йиғилганлар олқишига сазовор бўлди.
Тадбирга Ўзбекистон Ёзувчилар уюшмаси раиси, халқ шоири Сирожиддин Саййид бошчилигидаги ижодкорларнинг ташриф буюриши йиғилганларга ўзгача кайфият улашди.
Ўтказилган маънавий-маърифий тадбир якунида фаол иштирок этган профессор-ўқитувчилар, талаба ва ўқувчилар китоблар ҳамда Фахрий ёрлиқлар билан тақдирланди.

Пойтахтимиздаги Адиблар хиёбонида Молия ва бухгалтерия ҳисоби факультети ҳамда Бухгалтерия ҳисоби кафедраси томонидан “Тарихий шахслар, буюк алломалар ҳаёти ва ижодий фаолияти ватанпарварлик тарбиясида ибрат манбаи”  мавзусида маънавий-маърифий тадбир ташкил этилди.

Хабарингиз бор, Адиблар хиёбони адабиёт, маърифат ва маданият масканига айлантирилиб, мазкур масканда қад ростлаган ҳар бир адиб ҳайкали муайян олий ўқув юртига бириктириб берилган. Шундан келиб чиқиб, Тошкент давлат иқтисодиёт университети томонидан Муҳаммад Аминхўжа Мирзахўжа ўғли ижоди ва ибратли ҳаёт йўлини кенг жамоатчиликка етказиш мақсадида бу ерда очиқ дарслар, турли маърифий тадбирлар ўтказиб келинаяпти.

Бўлиб ўтган маданий-маърифий тадбир давомида Муқимий ижодини чуқур ўрганиш, унинг “Саёҳатнома” асари асосида амалга оширилган экспедициялар натижалари, олиб борилаётган илмий тадқиқотлар ва ёзилаётган янги асарлар ҳақида маълумотлар берилди.

Тадбирда Ўзбекистонда хизмат кўрсатган маданият ходими, шоир Бобур Бобомурод иштирок этиб, адабиёт ва маънавиятнинг инсон ҳаётидаги аҳамияти ҳақида тўхталиб ўтди. Ўз қаламига мансуб шеърлардан йиғилганларга ўқиб берди.

 

Тошкент давлат иқтисодиёт университетида “Оила ва жамият фаровонлигида қизларнинг ўрни” мавзусида талаба-қизлар форуми бўлиб ўтди.

Хабарингиз бор, мамлакатимизда ёш қизларимизни асраб-авайлаш, уларга тўғри тарбия бериш, халқимизга муносиб фарзандлар этиб камолга етказиш борасида республикамизда кенг миқиёсдаги амалий тадбирлар олиб борилмоқда.

Эслатиб ўтиш жоизки, 11 октябрь куни “Халқаро қизлар куни” сифатида бутун дунёда кенг нишонланади. “Халқаро қизлар куни” 2011 йилнинг 19 декабрида БМТ Бош Ассамблеясида 66/170 сонли резолюциясини қабул қилди ва уларнинг ҳуқуқлари эътироф этилди.

Бунда қизларнинг камситилиши, уларнинг ижтимоий муаммоларига бутун дунёнинг эътиборини қаратиш мақсадида ҳар йили нишонланади.

Шу муносабат билан Тошкент давлат иқтисодиёт университети томонидан “Оила ва жамият фаровонлигида қизларнинг ўрни” мавзусида талаба-қизлар форуми ташкил қилинди. Унда университет профессор-ўқитувчилари, талаба қизлар, Олий Мажлис Қонунчилик палатаси депутатлари ҳамда ОАВ вакиллари иштирок этди.

Университет ректори, профессор Кўнғиротбой Шарипов тадбирни кириш сўзи билан очиб, хотин-қизларнинг бугунги жамиятимиздаги ўрни ва ёш қизларимизнинг мамлакатимиз келажаги ҳамда унинг иқтисодий барқарорлигини таъминлашдаги ҳиссаси тўғрисида атрофлича тўхталиб ўтди.

Шундан сўнг, сўзга чиққан Олий Мажлис Қонунчилик палатасининг Фуқароларнинг соғлиғини сақлаш масалалари қўмитаси аъзоси Қизилгул Қосимова қизлар саломатлиги ва аёл бахтининг тўкислиги жамият тараққиётининг асосий омили эканлигини таъкидлади.

Шунингдек, тадбирда Олий Мажлис ҳузуридаги Ёшлар парламенти раиси Моҳиситора Муҳаммадюнусова “Қизларнинг ижтимоий-сиёсий саводхонлиги – давр талаби” мавзусидаги ўз маърузасини тадбир қатнашчиларига тақдим қилди.

Тадбир давомида Тошкент давлат иқтисодиёт университети талабаси Мадина Аслонова “Келажаги порлоқ юрт қизиман” мавзусидаги маърузасини йиғилганлар эътиборига ҳавола қилди.

Форум якунида иштирокчилар ўзларини қизиқтирган саволлар билан маърузачиларга мурожаат қилишди. Тадбир сўнгида университетнинг фаол қизлари фахрий ёрлиқлар билан, форум давомида ўз маҳоратларини кўргазмали намойиш этган қизларимиз ташаккурнома билан тақдирланди.

Тадбир онлайн ва офлайн тарзида ташкил этилди.

 

Тошкент давлат иқтисодиёт университетида 1 октябрь — “Ўқитувчи ва мураббийлар куни” байрами муносабати билан “Устозларни қадрлаймиз” шиори остида профессор-ўқитувчи ва ходимлар иштирокида спорт мусобақалари ўтказилди.

Тошкент давлат иқтисодиёт университети ва Урал давлат иқтисодиёт университети билан ҳамкорликдаги қўшма таълим дастурида таълим бериб келаётган профессор-ўқитувчилар иштирокида бўлиб ўтган спорт мусобақаларида “Стол тенниси”, “Волейбол”, “Мини футбол”, “Бадминтон”, “Шахмат” бўйича мусобақалар ташкил этилди.

Мазкур мусобақада университетнинг барча факультет, кафедра ва бўлимларида фаолият юритаётган профессор-ўқитувчилар ва ишчи-ходимлардан иборат жамоалар муносиб иштирок этди.

Яккалик баҳсларда спортнинг “Стол тенниси” тури бўйича Банк иши ва инвестициялар кафедраси мудири Зокир Мамадияров, “Бадминтон” тури бўйича Жаҳон иқтисодиёти кафедраси мудири Нилуфар Исмаилова, Корпоратив бошқарув кафедраси катта ўқитувчиси А. Шермухаммедов, “Шахмат” тури бўйича Банк иши ва инвестициялар кафедраси мудири Зокир Мамадияровлар 1-ўринни эгаллашди.

Жамоавий баҳсларда спортнинг “Валейбол” тури бўйича Корпоратив бошқарув факультети аёллар жамоаси фаҳрли 1-ўринни эгаллади.

Шунингдек, спортнинг “Мини футбол” тури бўйича Маъмурият жамоси 1-ўрин, Иқтисодиёт факультети жамоаси 2-ўрин, Корпоратив бошқарув факультети жамоаси 3-ўринни эгаллади.

Умумжамоа ҳисобида Корпоратив бошқарув факультети жамоси энг кўп медалларни қўлган киритиб биринчи ўринни қўлга киритди.

“Устозларни қадрлаймиз” шиори остида ўтказилган ушбу спорт мусобақалари иштирокчиларга кўтаринки руҳ баҳш этди.  Спорт мусабоқалари якунида ғолиблар диплом ва медаллар ҳамда эсдалик совғалари билан тақдирланишди.

 

Ўзбекистон Республикаси Президенти Шавкат Мирзиёевнинг 2020 йил 24 январда Олий Мажлисга йўллаган Мурожаатномасини жойларда ўрганиш ва кенг жамоатчилик ўртасида тарғиб этишга бағишланган тадбирлар давом этмоқда. Шу мақсадда комбинатнинг барча бўлинмаларида “Илм, маърифат ва рақамли иқтисодиётни ривожлантириш йили” давлат дастури доирасида “Янгиланаётган Ўзбекистон: ислоҳотлар ва ўзгаришлар” мавзусида тарғибот тадбирлари бўлиб ўтаяпти.

Яқинда НКМК Маънавият ва маърифат маркази томонидан Тошкент давлат иқтисодиёт университети профессорлари Бекдавлат Алиев ва Азамат Мухторовлар иштирокида шу мавзудаги тарғибот тадбирлари Навоий машинасозлик заводи, Геология-қидирув экспедитсияси, Марказий моддий-таъминот базаси ишчи-ходимлари иштирокида ўтказилди. Уларда бешта устувор йўналиши бўйича Ҳаракатлар стратегиясининг “Илм, маърифат ва рақамли иқтисодиётни ривожлантириш йили”да амалга оширилиши кўзда тутилган муҳим ижтимоий-иқтисодий ислоҳотлар, уларнинг жамиятимиздаги аҳамияти алоҳида таъкидланди. Шунингдек, Президентимизнинг парламентга қилган Мурожаатномаси муҳим дастурий сиёсий ҳужжат эканлиги, унда мамлакатимизни яқин келжакда ривожлантиришга оид йўналишлар белгилаб берилганлиги, юртимизда коррупцияга қарши курашиш борасида олиб борилаётган чора-тадбирлар тушунтирилди.

Тадбирларда иштирокчиларни қизиқтирган саволларга олимлар томонидан жавоблар берилди. Бундай тадбирлар комбинатнинг барча бўлинмаларида давом этади.

 

 

НКМК матбуот маркази

Хабарингиз бор, “Наврўз” умумхалқ байрами муносабати билан юртимизда 14-15 март кунлари “Обод юрт” шиори остида умумхалқ ҳашари ўтказилиши белгиланган.

Шу муносабат билан Тошкент давлат иқтисодиёт университети жамоаси аъзолари ҳам ўзи меҳнат қилаётган, таълим олаётган ҳудудларни, ариқлар, кўчалар, хиёбонларни тозалаш ва ободонлаштириш ишларида иштирок этаётир. Улар университет ҳудудида қолаверса, пайтахтимизнинг Чилонзор туманида жойлашган “Ғофур Ғулом” номидаги истироҳат боғи ҳудудида тозалаш, ободонлаштириш, кўкаламзорлаштириш ишларидаги фаоллиги билан мамлакатимизга кириб келган баҳор байрамига ўзига хос туҳфа тайёрладилар.

Ёшлар иттифоқи ташаббуси билан ташкил этилган «Ўз кўчатимни экдим» шиори остидаги акциясида университет фаол талаба-ёшлари иштирок этиб, Чилонзор тумандаги ҳудудларда кўчатлар ўтқазди.

2020 йил 14 март куни Тошкент давлат иқтисодиёт университетида 2019-2020 ўқув йили битирувчилари учун “Карьера куни” ахборот-таништирув тадбири бўлиб ўтди.

Тадбирнинг очилиш қисмида сўзга чиққанлар таълим ва фан соҳасини ривожлантириш бўйича узлуксиз таълим тизимини янада такомиллаштириш, сифатли таълим хизматлари имкониятларини ошириш, меҳнат бозорининг замонавий эҳтиёжларига мос юқори малакали кадрлар тайёрлаш сиёсатини давом эттириш вазифасини бажаришда иш берувчилар ва олий таълим муассасалари ўртасидаги мустаҳкам ҳамкорлик алоҳида ўринга эга эканлиги қайд этдилар.

Маълумки, олий таълим муассасалари битирувчилари бандлигини таъминлаш, меҳнат бозори мутаносиблиги ва инфратузилмаси ривожланишини таъминлаш, ишсизлик даражасини камайтириш ижтимоий соҳани ривожлантиришнинг устувор йўналишларидир.

Шу маънода университетда 2019-2020 ўқув йили битирувчиларини битирувчиларни ишга тақсимлаш ва жойлаштириш бўйича зарур чора-тадбирлар амалга оширилди. Жумладан, битирувчиларни муносиб иш ўринлари билан таъминлаш мақсадида Қорақалпоғистон Республикаси Вазирлар Кенгаши ва вилоят ҳокимликлари билан яқиндан алоқалар ўрнатилди.

Тадбир давомида тижорат банклари ҳамда йирик компания вакиллари томонидан маҳорат дарслари ўтказилди. Бакалавриат ва магистратуранинг битирувчи курс талабалари билан таклиф этилган иш берувчи вазирликлар, қўмиталар, компаниялар, ташкилотлар, корхоналарнинг вакиллари ўртасида ишга жойлашиш ва касбга-йўналтириш бўйича мулоқотлар олиб борилди. Шунингдек, битирувчиларни ишга жойлаштириш бўйича Тошкент давлат иқтисодиёт университети ҳамда таклиф этилган иш берувчилар ўртасида ҳамкорлик шартномалари имзоланди.

“Карьера куни” ахборот-танишитирув тадбири давомида бўш иш ўринлари билан иштирок этаётган иш берувчи вазирлик, муассаса, ташкилот ва корхоналарга битирувчи талабалар тўғрисида маълумотлар тақдим этилди. Жумладан, жорий 2019-2020  ўқув йилида университетни тамомлаётган 1106 нафар (бакалавриат босқичида 865 нафар ва магистратура босқичида 241 нафар) битирувчилар ҳақидаги маълумотлар иш берувчилар эътиборига ҳавола қилинди.

Ҳозирги кунда Тошкент давлат иқтисодиёт университетида бакалавириат босқичида 14 та таълим йўналиши ҳамда 23 та магистратура мутахассислиги бўйича кадрлар тайёрланмоқда.

Тадбирда Ўзбекистон Республикаси Олий ва ўрта махсус таълим вазирлиги, Иқтисодиёт ва саноат вазирлиги, Молия вазирлиги, Бандлик ва меҳнат муносабатлари вазирлиги, Давлат қўмиталари, Бош прокуратура, Марказий банк, тижорат банклари, шунингдек, мулкчиликнинг турли шаклларидаги 200 дан ортиқ компаниялар, фирмаларнинг раҳбарлари ва мутахассислари иштирок этдилар.

 

Тошкент давлат иқтисодиёт университети ректори Конгратбай Шарипов профессор-ўқитувчилар, илмий изланувчилар ва талаба-ёшларнинг стартап-лойиҳалари танловини ташкил этишга бағишланган йиғилиш ўтказди. Унда проректорлар, факультет деканлари, илмий ишлар бўйича декан ўринбосарлари ва кафедра мудирлари иштирок этдилар.

Йиғилишда профессор-ўқитувчилар, илмий изланувчилар ва талаба-ёшларнинг ташаббусларини қўллаб-қувватлаш, истиқболли стартап лойиҳаларининг инкубация ва акселерация жараёнларини ташкил этиш масалалари муҳокама қилинди.

Йиғилиш якунида муҳокама қилинган масалалар юзасидан масъул ходимларга тегишли вазифалар юклатилди.

 

Toshkent davlat iqtisodiyot universitetining Buxgalteriya hisobi va audit fakulteti tomonidan Xalqaro xotin-qizlar bayrami munosabati bilan “Ayol borki olam munavvar”nomli bayram tadbiri tashkil etildi.

Yoshlar bilan ishlash bo‘yicha proektor Sadriddin Xudoyqulov bayram bilan barcha xotin-qizlarni tabriklab, tadbirni ochib berdi.

Bayram tadbirida fakultet talabalari tomonidan Vatanni, bahorni, onalarni ulug‘lovchi kuy-qo‘shiq, raqs, sahna ko‘rinishlari, she’rlar ijro etildi. “Dovrug‘i dunyoga dostonlar” nomli quvnoqlr va zukkolar sahna ko‘rinishlari yig‘ilganlar ko‘ngliga yuqori kayfiyat ulashdi.

Tadbirda ishtirok etgan talabalar o‘zlarini chiqishlari bilan tadbirga tashrif buyurgan lobar ayollar va qizlarni bayram bilan tabriklashdi.