YANGILIKLAR

Bo'lim: Seminarlar

Oliy harbiy davlat bojxona instituti va Toshkent davlat iqtisodiyot universiteti tomonidan 2019 yil 25 martda imzolangan hamkorlik memorandumiga asosan “Tashqi iqtisodiy faoliyatni erkinlashtirish jarayonlarini yanada jadallashtirishning dolzarb masalalari” mavzusida davra suhbati o‘tkazildi. Bojxona tartibga solinishi va bojxona to‘lovlari hamda Jahon iqtisodiyoti kafedralari hamkorligida tashkil etilgan davra suhbatida bojxona vakillari, professor-o‘qituvchilar, ilmiy izlanuvchilar ishtirok etdi.

Tadbirda Jahon iqtisodiyoti kafedrasi professori, t.f.d. A. Shermuxammedov “O‘zbekiston Respublikasining Jahon savdo tashkilotiga kirish muammolari” mavzusida ma’ruza qildi. Respublikamizda tashqi iqtisodiy faoliyatni liberallashtirish va rivojlantirish, bu jarayonni faollashtirishda tashqi savdoni erkinlashtirish, milliy iqtisodiyotning xalqaro moliya-kredit, investitsiya, soliq-bojxona, valyuta va sug‘urta tizimiga integratsiyasini jadallashtirishga doir ustuvor vazifalar ijrosi samarali amalga oshirilayotganligi haqida to‘xtalib o‘tdi.

Davlat boshqaruv akademiyasi Iqtisodiyot va moliya kafedrasi dotsenti, PhD. U. Pardaev “Davlat xaridlari tizimida tashqi iqtisodiy faoliyatni muvofiqlashtirish masalalari” mavzusida o‘z ma’ruzasini davra suhbati qatnashchilariga taqdim etdi. Ma’ruzachi tomonidan bugungi kunda mamlakatimiz tashqi iqtisodiy faoliyatini rivojlanitirish yo‘lida amalga oshirilayotgan islohotlar, shuningdek, davlat xaridlari tizimida tashqi iqtisodiy faoliyatni muvofiqlashtirish bo‘yicha islohotlarning tutgan o‘rni, xususan, bu boradagi o‘zgarishlar, rivojlanishlar, chegara va bojxona nazorati haqida to‘liq ma’lumotlar taqdim etildi. Soha rivojiga to‘siq bo‘layotgan va o‘z yechimini kutib turgan muammolar haqida ham alohida to‘xtalib o‘tildi.

Shundan so‘ng, Davlat soliq qo‘mitasi huzuridagi Malaka oshirish markazi dotsenti, i.f.n. M. Qutbidinova “Erkin iqtisodiy zonalarga berilayotgan imtiyoz va preferensiyalar” mavzusidagi ma’ruzasi bilan qatnashib, respublikada erkin iqtisodiy zonalarning faoliyati samaradorligini oshirishga qaratilgan bir qator chora-tadbirlarning amalga oshirilayotganligini ta’kidlab, erkin iqtisodiy hududlarga xorijiy va mahalliy investitsiyalarni jalb etishga ko‘maklashadigan keng ko‘lamli soliq va bojxona imtiyozlari hamda preferensiyalari tizimi shakllantirilganligi natijada esa hozirgi kunda respublikamizning 10 ta mintaqasida 14 ta erkin iqtisodiy va kichik sanoat zonalari tashkil etilib, hozirgacha ushbu zonalarda 62 ta loyiha amalga oshirilib, yana 87 ta loyiha bo‘yicha ishlar davom ettirilayotganligi xususidagi ma’lumotlarni davra suhbati ishtirokchilariga ma’ruzasi davomida yetkazdi.

So‘ngra so‘z Toshkent davlat iqtisodiyot universiteti “Jahon iqtisodiyoti” kafedrasi mudiri i.f.n. dots. N. Ismailova “Xalqaro iqtisodiy integratsiya jarayonlarida O‘zbekistonning ishtiroki” deb nomlangan o‘z ma’ruza taqdimoti bilan chiqish qildi. Ma’ruzada respublikamiz xalqaro integratsion jarayonlarga tezkorlik bilan javob qaytarayotganligini ta’kidlanib, mavzuning amaliy va ilmiy jihatlari asoslab berildi.

Bojxona tartibga solinishi va bojxona to‘lovlari kafedrasi dotsenti, bojxona xizmati podpolkovnigi T. Pardaev “Tashqi iqtisodiy faoliyatni liberallashtirishda bojxona to‘lovlarining o‘rni” mavzusidagi ma’ruzasida mamlakatimizda tadbirkorlarga yaratilayotgan qulayliklar va bojxona to‘lovlaridan berilayotgan imtiyozlar natijasida respublikamiz tashqi iqtisodiy faoliyat ko‘rsatkichlari ham yildan-yilga keskin o‘sib borayotganini qayd etdi.

Tadbir so‘ngida Toshkent davlat iqtisodiyot universitetining Jahon iqtisodiyoti kafedrasi mudiri N. Ismailova mazkur innovatsion-korporativ hamkorlik doirasidagi davra suhbati juda mazmunli va qiziqarli o‘tganligi, mavzu yuzasidan o‘zaro almashilgan fikr va mulohazalar o‘zining ilmiy-amaliy, nazariy-uslubiy ahamiyatga ega ekanligi, tadqiqotlar natijasida tayyorlangan taqdimot ma’lumotlarga boy tarzda o‘tganligi, yangiliklarga to‘laligi bilan ahamiyatli bo‘lganligini ta’kidladi. Davlat bojxona qo‘mitasi Bojxona instituti rahbariyati hamda Bojxona tartibga solinishi va bojxona to‘lovlari kafedrasi xodimlariga hamkorlik uchun minnatdorchilik bildirdi.

 

Toshkent davlat iqtisodiyot universitetida Germaniyaning SPRINGER NATURE kompaniyasi tomonidan “O‘zbekistonning fan va ta’lim uchun elektron axborot resurslari. SPRINGER NATURE ma’lumotlar bazasi” mavzusida mahorat darsi o‘tkazildi.

O‘tkazilgan seminar davomida “Ilmiy tadqiqot faoliyatida Springerlink platformasidan foydalanish”, “Tadqiqot mavzusiga yuqori reytingli jurnallarni va tadqiqot mavzusidagi maqolani tanlash”, “Yuqori sifatli maqolani tayyorlash va uni chet el jurnallarida nashr etish”, “Springer Nature”da monografiya tayyorlash va nashr qilish” kabi mavzular taqdim etildi va ishtirokchilar tomonidan muhokama qilindi.

Ma’lumot o‘rnida aytib o‘tamiz, SPRINGER NATURE 1842-yildan beri mavjud bo‘lgan dunyodagi eng yirik ilmiy nashriyotlardan biri hisoblanadi.

O‘zbekiston Respublikasi Innovatsion rivojlanish vazirligi va SPRINGER NATURE kompaniyasi o‘rtasida imzolangan memorandumga muvofiq, O‘zbekiston Respublikasi Fanlar akademiyasi kutubxonalari, ilmiy va ilmiy-tadqiqot markazlari 2019 yil may va iyul oylari mobaynida SPRINGER NATURE ilmiy va ta’lim resurslariga bepul kirish imkonini beradi. Ushbu resusrlar ro‘yxatida 3000 dan ortiq ilmiy darajali jurnallar joy olgan.

 

Bugun, 31-may kuni Toshkent davlat iqtisodiyot universitetida O‘zbekiston oliy ta’lim muassasalarining Yoshlar bilan ishlash bo‘yicha prorektorlari uchun amaliy seminar bo‘lib o‘tdi. Unda davlatimiz rahbari tashabbusi bilan ilgari surilgan 5 ta tashabbus, uni amalga oshirish va oliy ta’lim muassasalarida yoshlar bilan ishlash bo‘yicha olib borilayotgan ishlar muhokama qilindi hamda tegishli vazifalar belgilab olindi.

Amaliy seminarda Toshkent davlat iqtisodiyot universiteti rektori Bahodir Xodiyev, Vazirlar Mahkamasi huzuridagi Din ishlar bo‘yicha qo‘mita raisi o‘rinbosari Muzaffar Komilov, Oliy va o‘rta maxsus ta’lim vazirligi boshqarma boshlig‘i Otabek Bozorov va boshqalar so‘zga chiqib, kadrdar tayyorlashning sifat bosqichini muvaffaqiyatli amalga oshirish, yoshlar bilan ishlashda mamlakatimiz rahbariyati e’tibor qaratayotgan ustuvor vazifalar ijrosini ta’minlash, yoshlar ma’naviyatini yuksaltirish, ular o‘rtasida kitobxonlikni keng targ‘ib qilish bo‘yicha samaradorlikka erishish yo‘llariga to‘xtalib o‘tdilar.

Amaliy seminar davomida ma’ruzachilar tomonidan “Eng faol bilimdon kitobxonlar” ko‘rik-tanlovini tashkil etish, uning Nizomi doirasida tayyorgarlik ko‘rish va uni yuqori saviyada o‘tkazish bo‘yicha uslubiy, amaliy tavsiyalar berildi.  Jumladan, ishtirokchilarga Toshkent davlat iqtisodiyot universiteti  tashabbusi bilan talaba-yoshlarning o‘z aql-zakovatini namoyon etishga ko‘maklashish, kitob o‘qishga bo‘lgan qiziqishlarini yanada oshirish hamda o‘zbek va jahon adabiyotining sara asarlariga mehr uyg‘otish maqsadida o‘tkazilayotgan “Eng faol bilimdon kitobxonlar” ko‘rik-tanlovi tadbirlarini o‘tkazishning mexanizmlari haqida ma’lumot berildi.

Oliy ta’lim muassasalaridagi Yoshlar bilan ishlash bo‘yicha prorektorlari amaliy ko‘nikmalarga ega bo‘lishlari uchun “Eng faol bilimdon kitobxonlar” ko‘rik-tanlovi festivalida ishtirok etishga taklif etildi.

 

 

 

 

 

 

 

 

 

 

 

 

2019-yil 30-may kuni Toshkent davlat iqtisodiyot universiteti Iqtisodiyot nazariyasi kafedrasi tomonidan “Korxonalarda ishlab chiqarish xarajatlarini kamaytirish va mahsulot eksportini oshirishda sifatni boshqarish tizimlarining roli” mavzusida innovatsion-korporativ hamkorlik doirasidagi ilmiy-amaliy seminar o‘tkazildi. Unda “O‘zbek-Turk test markazi” MChJ qo‘shma korxonasi yetakchi mutaxassislari, professor-o‘qituvchilar, doktorantlar, magistratura talabalari va iqtidorli talabalar ishtirok etdi.

Ta’kidlandiki, ishlab chiqarish xarajatlarini kamaytirish, mahsulot eksportini oshirishda sifatni boshqarish tizimlarining roli, tashqi iqtisodiy aloqalarni rivojlantirishning ustuvor yo‘nalishlari hisoblangan eksportga mahsulot ishlab chiqarishni yo‘lga qo‘yish, xorijiy investitsiyalarni jalb etish jarayonlarida ma’lum bir muammolar mavjud bo‘lib, ularning hal etilishi bugungi kunning dolzarb vazifasi hisoblanadi.

2018-yil davomida yana 877 korxona eksport faoliyatiga jalb etildi, mahalliy mahsulotlarni chetga yetkazish geografiyasi 60 ta yangi bozorga ko‘paydi. Xususan, Birlashgan Arab Amirliklari, Livan, Iordaniya, Iroq, Gana, Senegal, Kot-d`Ivuar, Somali, Nigeriyaga yengil avtomobillar, Shvetsiya, Ruminiya, Bolgariya, Turkiya, Indoneziya, Molodoviya va Ozarbayjonga mineral o‘g‘itlar, Belarus, Ozarbayjonga sport poyafzallari, Polsha va Janubiy Koreyaga charm buyumlar va boshqa mahsulotlar eksport qilindi.

Ilmiy-amaliy seminar maqsadidan kelib chiqib quyidagi vazifalar belgilab olindi:

mamlakatimizda korxonalarda ishlab chiqarish xarajatlarini kamaytirish va mahsulot eksportini oshirishda sifatni boshqarish tizimlarining rolini oshirish borasida erishilgan yutuqlar, natijalarni baholash va rivojlanish istiqbollarini belgilashga oid yangi ilmiy g‘oyalar yo‘nalishlarining konseptual asoslarini shakllantirish;

korxonalarda ishlab chiqarish xarajatlarini kamaytirish va mahsulot eksportini oshirishda sifatni boshqarish tizimlarining roli bo‘yicha professor-o‘qituvchilar, doktorantlar va amaliyotchilarning ilmiy taklif hamda amaliy tavsiyalarini jamlash, ular bo‘yicha tegishli vazirlik, idoralarga taqdim etiladigan taklif va amaliy tavsiyalar tizimini shakllantirish;

ilmiy-amaliy seminarda tinglangan ma’ruzalar asosida mavjud darslik, o‘quv-uslubiy qo‘llanmalarni yanada boyitish, ta’lim tizimini modernizatsiyalash maqsadlarida ulardan keng foydalanish.

O‘tkazilgan ilmiy-amaliy seminarda:

“Ishlab chiqarish korxonalarida xarajatlar tarkibini optimallashtirish”

Ma’ruzachi – Muzaffarxon Xamzayev, “O‘zbek-Turk test markazi” MChJ qo‘shma korxonasi bosh direktori ;

“Zamonaviy ishlab chiqarish korxonalarida sifat menejmenti xalqaro standartlari”

Ma’ruzachi – Yusuf Ziyadullayev,   “O‘zbek-Turk test markazi” MChJ qo‘shma korxonasi yetakchi mutaxassisi;

TDIU Iqtisodiyot nazariyasi kafedrasi dotsenti, iqtisodiyot fanlari nomzodi Boev Xabibullo Ismailovich – “Innovatsion taraqqiyotning ustuvor yo‘nalishlari va istiqbollari”;

TDIU Iqtisodiyot nazariyasi kafedrasi dotsenti Yaxshieva Mavluda – “Iste’mol tovarlari raqobatbardoshligini oshirishda marketingning roli”;

TDIU Iqtisodiyot nazariyasi kafedrasi dotsenti, iqtisodiyot fanlari nomzod Mamaraximov Bekzod  – “Ishchi kuchi sifatini oshirish ishlab chiqarish xarajatlarini kamaytirishning usuli”;

TDIU Iqtisodiyot nazariyasi kafedrasi katta o‘qituvchisi Sharipov Quvondiq – “Korxonada ishlab chiqarish samaradorligini oshirishning ustuvor yo‘nalishlari”;

TDIU Iqtisodiyot nazariyasi kafedrasi assistenti Ganiyev Baxtiyor  – “Tovarlar raqobatbardoshligini ta’minlashning asosiy yo‘nalishlari” mavzularida ma’ruzalari bilan ishtirok etishdi.

Ilmiy-amaliy seminar yakunida kafedra mudiri dotsent B.Xajiyev tadbir ishtirokchilariga minnatdorchilik bildirdi, shu bilan birga, korxonalarda ishlab chiqarish xarajatlarini kamaytirish va mahsulot eksportini oshirishda sifatni boshqarish tizimlarining rolini oshirishda yuzaga kelayotgan muammolarni hal etish yo‘llarini izlab topish, bu yo‘nalishda iqtisodchi olimlar va amaliyotchilarning taklif-tavsiyalarini ishlab chiqish yo‘lida muvaffaqiyatlar tiladi.

 

 

 

Bugun, 24-may kuni Buxgalteriya hisobi va audit fakulteti hamda Moliya va soliqlar kafedrasi tomonidan O‘zbekiston Respublikasi Davlat soliq qo‘mitasi xodimlari ishtirokida seminar o‘tkazildi. Unda Moliya va soliqlar kafedrasi professor-o‘qituvchilari, Buxgalteriya hisobi va audit fakulteti rahbar xodimlari hamda  “Soliqlar va soliqqa tortish” ta’lim yo‘nalishi talabalari ishtirok etdi.

Seminar Davlat soliq qo‘mitasi va Toshkent davlat iqtisodiyot universiteti o‘rtasidagi korporativ hamkorlik bo‘yicha tuzilgan shartnoma hamda “Bo‘lajak soliqchilar klubi”ni tashkil etish borasida imzolangan memorandumga muvofiq tashkil etildi.

Mazkur seminardan ko‘zda tutilgan asosiy maqsad “Soliqlar va soliqqa tortish” ta’lim yo‘nalishida tahsil olayotgan talabalarga o‘quv va malakaviy amaliyotni davlat soliq xizmati organlarida tashkil etish, soliq xizmati organlarida ishga joylashish bilan bog‘liq masalalar yuzasidan ma’lumotlar taqdim etishdan iborat bo‘ldi.

Seminarda Davlat soliq qo‘mitasi boshqarma boshlig‘i To‘rabek To‘rayev, bosh inspektor Fazliddin Sayidalievlar ishtirok etib, talabalarga kun tartibiga kiritilgan masala bo‘yicha ma’lumotlar berib o‘tdi.

 

 

 

Bugun, 20-may kuni Toshkent davlat iqtisodiyot universitetida “Muloqot va boshqaruv psixologiyasi” mavzusida mahorat darsi bo‘lib o‘tdi. Kasb ta’limi (iqtisodiyot) kafedrasi tomonidan tashkil etilgan dars mashg‘ulotini psixologiya fanlari doktori, professor Vasila Karimova olib bordi.

Mahorat darsida jamoadagi psixologik holatlar, munosabatlar, ommaviy harakatlar shaxsga ta’sir o‘tkazish bo‘yicha o‘z-o‘zini, guruh va jamoani boshqarish, unda psixologik iliq muhitni ta’minlash, hamkorlik faoliyatining samaradorligini oshirish, shaxslararo munosabatning yuksak darajasini vujudga keltirish, nizoli va ziddiyatli vaziyatlarni oldini olish masalalari haqida so‘z yuritildi.

Tadbir jonli muloqot tarzida o‘tib, talabalar o‘zilarini qiziqtirgan savollar yuzasidan ma’ruzachiga murojaat qildilar va tegishli javoblarni oldilar.

 

 

 

2019-yil 16-17 May kunlari Miran International mehmonxonasida Amerika qo‘shma shtatlari elchixonasi, American Council tashkiloti va O‘zbekiston hukumati tashabbusi bilan Amerikadan yurtimizga tashrif buyurgan expertlar guruhi va Markaziy Osiyo davlatlaridan kelgan oliy ta’lim muassasalari vakillari ishtirokida seminar bo‘lib o‘tdi.

Qizg‘in bahs-munozalarga boy o‘tgan seminarda Markaziy Osiyo davlatlari oliy ta’lim tizimi faoliyatini yanada rivojlantirish, xalqarolashtirish masalalari, professor-o‘qituvchilar va talabalar almashinuvi, oliy ta’lim muassasalarilarda yozgi maktab tashkil etish masalalari muhokama qilindi.

 

 

Tadbirda Toshkent davlat iqtisodiyot universiteti vakillari hamda hozirda Fulbright Specialist granti asosida TDIUda  bo‘lib turgan professor Mark Rosenbaum ham ishtirok etib, Toshkent davlat iqtisodiyot univeristetidagi hamkorlik faoliyati, tashkil etilayotga Xizmatlar boshqaruvi markazi va kelgusidagi hamkorlik aloqalarini rivojlantirish bo‘yicha mahorat darsi o‘tdi.

TDIUning Ilmiy-innovatsion ishlanmalarni tijoratlashtirish bo‘limi va Xalqaro hamkrolik bo‘limi xodimlari hamkorlikning yangi yo‘nalishlari bo‘yicha kelishuvga erishishdi.

 

 

2019 yilning 3-5 may kunlari Toshkent viloyati Bo‘stonliq tumanida joylashgan “Sokol” oromgohida Toshkent davlat iqtisodiyot universiteti Korporativ boshqaruv fakulteti tashabbusi bilan universitetning 100 nafar faol va iqtidorli talabalari “Yosh iqtisodchi-liderlar munozara klubi”da ishtirok etib, sayyor seminarlarda ishtirok etdilar.

Sayyor seminarning ochilish qismida Vazirlar Mahkamasi huzuridagi Din ishlari bo‘yicha qo‘mita raisi o‘rinbosari Muzaffar Komilov, Toshkent davlat iqtisodiyot universiteti rektori Bahodir Xodiev, Kasaba uyushma qo‘mitasi raisi Azamat Muxtorov va boshqalar so‘zga chiqib, mamlakatimizda yoshlarning bilim olishlari, yuksak ilm cho‘qqilarini egallashi uchun davlat darajasida berilayotgan e’tiborning ahamiyati xususida to‘xtalib o‘tdilar.

Shundan so‘ng ishtirokchilar 4 ta guruhga bo‘lingan holda turli mavzularda bahs-munozara va muhokamalarda ishtirok etdilar.

Aytish joizki, seminarga taklif etilgan Respublikamizning ko‘zga ko‘ringan taniqli mutaxassislari tomonidan tashkil etilgan mahorat darslari ishtirokchilarning bilim va ko‘nikmalarini yanada oshirishga xizmat qildi. Jumladan, “Iqtisodchi yoshlarda liderlik ko‘nikmalarni shakllantirish”, “Nutq madaniyati va notiqlik san’ati sirlari”, “Iqtisodchilarning kasbiy kompetentligi va kreativligi”, “Jamoa bilan ishlashda muammoli vaziyatlar: to‘siqlar va ularni yechish texnikasi”, “Jamoada yuzaga keladigan munosabatlar psixologiyasi”, “Ziddiyatlar va unga moyil xulq-atvorli shaxs tiplari”, “Yoshlarda diniy, ma’naviy va ahloqiy tarbiya masalalari”, “Yoshlarning ijodiy va intellektual saloxiyatini ro‘yobga chiqarish”, “Iste’dodli, iqtidorli yoshlarni ilmiy faoliyatga faol jalb etish va startap loyihalari”, “Mustaqil qaror qabul qilish va jamoani boshqarish” kabi mavzular ishtirokchilarda katta qiziqish uyg‘otdi.

Seminar davomida ishtirokchilar turli ko‘rik-tanlovlar, sport musobaqalarida o‘z mahoartlarini sinovdan o‘tkazib, gulxan atrofida o‘z iqtidorlarini namoyon etdilar.

Iqtidorli yoshlar qimmatbaho sovg‘alar bilan munosib taqdirlandi. Sayyor seminar moderatorlari va ishtirokchilariga sertifikatlar topshirildi.

Munozara klubining sayyor seminari tog‘ bag‘ridagi xushmanzara tabiat qo‘ynida bo‘lganligi ishtirokchilarda ajoyib taassurot qoldirdi. Bir so‘z bilan aytganda seminar takrorlanmas va unutilmas daqiqalarga boy bo‘ldi.

 

 

 

 

 

 

 

 

Sanoat iqtisodiyoti kafedrasi professor-o‘qituvchilari — prof. Ra’no Nazarova, dots. Musaxon Isoqov, dots. Akbar Yadgarovlar hamda 1-kurs “Iqtisodiyot (tarmoqlar va sohalar bo‘yicha)” magistratura mutaxassisligi talabalari faoliyat bilan yaqindan tanishish va mahorat darsi o‘tish maqsadida “ARTEL” kompaniyasiga tashrif buyurdilar.

 

 

Dastlab “ARTEL” kompaniyasi faoliyati bilan yaqindan tanishtirish maqsadida kompaniyaning Plastmassa buyumlarini ishlab chiqarish texnologik va qayta ishlash bo‘yicha direktor o‘rinbosari A.Yu. Lyubidskiy talabalarga ishlab chiqarish va qayta ishlash jarayoni bilan tanishtirdi. Talabalar bevosita ishlab chiqarish jarayonini ko‘rishdi va yangi zamonaviy uskunalar bilan jihozlanish holatiga guvoh bo‘lishdi.

 

 

“ARTEL” kompaniyasining kir yuvish mashinalari ishlab chiqarish bo‘yicha direktor o‘rinbosari F.A. Mirbabaev talabalarga ishlab chiqarish va qayta ishlash jarayoni bilan tanishtirdi. Ushbu ishlab chiqarish bo‘limida talabalar aynan kir yuvish mashinalari ishlab chiqarish jarayonini ko‘rishdi, laboratoriyalar faoliyati bilan yaqindan tanishishdi, xalqaro standartlar doirasida ishlab chiqarishning “Sifat” standartlari talablari haqida ma’lumotlarga ega bo‘ldilar.

 

 

Shuningdek,“ARTEL” kompaniyasi faoliyati bilan yaqindan tanishtirish maqsadida kompaniyaning muzlatgichlar ishlab chiqarish bo‘yicha direktor o‘rinbosari A.X. Temurov talabalarga muzlatgichlar ishlab chiqarish jarayoni, ishlab chiqarish detallari, preslash uskunalari haqida qisqacha tushuntirish ishlarini olib bordi.

“ARTEL”, “Samsung”, “Shivaki” brendi ostida chiqarilayotgan muzlatgich va boshqa turdagi texnik vositalar ishlab chiqarish faoliyati bilan tanishtirildi. Talabalar o‘zlarini qiziqtirgan savollar bilan murojaat qilishdi. Ko‘pchilik talabalar kompaniyada ishlash bo‘yicha o‘z istaklarini bildirishdi.

 

 

“Iqtisodiyot (tarmoqlar va sohalar bo‘yicha)” magistratura mutaxassisligi talabalarida “ARTEL” kompaniyasiga uyushtirilgan mahorat darsi katta taassurot uyg‘otdi va bu kabi tadbirlarni boshqa ishlab chiqarish kompaniyalari bilan ham amalga oshirish bo‘yicha o‘z xohishlarini bildirgan holda amaliyotga va mehnat faoliyatini davom ettirishga bo‘lgan qiziqish yanada ortdi.

Toshkent davlat iqtisodiyot universiteti Makroiqtisodiyot kafedrasi tomonidan “Toshkent shahar investitsion strategiyasini shakllantirish va uni aholi turmush darajasini oshirishga ta’sirini baholash” mavzusida innovatsion-korporativ hamkorlik doirasida ilmiy-amaliy seminar tashkil etildi. Seminar Iqtisodiyot va sanoat vazirligi, Toshkent shahar iqtisodiyot va kompleks rivojlantirish bosh boshqarmasi bilan hamkorlikda o‘tkazildi.

 

 

Ilmiy amaliy seminarda quyidagi mavzulardagi ma’ruzalar tinglandi va muhokama qilindi:

“Инновационный подход к формированию стратегического планирования”

Ma’ruzachi: Yodgor Fayzullayev, Iqtisodiyot va sanoat vazirligi bo‘lim boshlig‘i;

 

 

“Toshkent shahrining investitsion faoliyatini aholi turmush darajasiga ta’sirini baholash”

Ma’ruzachi: Narimon Ismailov, Toshkent shahar iqtisodiyot va kompleks rivojlantirish bosh boshqarmasi boshlig‘i;

 

“O‘zbekistonda so‘nggi yillarda erishilgan iqtisodiy natijalar tahlili va muammolari”

Ma’ruzachi: Fazliddin Nasriddinov, Iqtisodiyot va sanoat vazirligi bo‘lim boshlig‘i;

 

 

“Iqtisodiy o‘sishni ta’minlashda innovatsion omillar rolini oshirish yo‘llari”

Ma’ruzachi: Shoxjahon Soqiyev, TDIU magistranti;

 

“O‘zbekistonda ta’lim tizimini xususiylashtirish zarurati va istiqbollari”

Ma’ruzachi: Indira Muxtarova, Iqtisodiyot fakulteti talabasi.

 

 

Ilmiy-amaliy seminar ishtirokchilari taqdim etilgan ma’ruzalar yuzasidan o‘zlarini qiziqtirgan savollar yuzasidan ma’lumotga ega bo‘ldilar va kun tartibiga qo‘yilgan mavzu atrofida muhokama olib bordilar.