archive.php

2018-yilning 26-iyun kuni BMTning inson huquqlari bo‘yicha Oliy komissari Zayd Raad al-Husayn hamda O‘zbekistonning 20dan ortiq oliy ta’lim muassasalari talaba va tinglovchilari ishtirokida vebinar o‘tkazildi. Videomuloqot Inson huquqlari bo‘yicha O‘zbekiston Respublikasi milliy markazi Oliy va o‘rta maxsus ta’lim vazirligi hamda Birlashgan millatlar tashkilotining Inson huquqlari bo‘yicha Oliy komissari boshqarmasi, BMTning Inson huquqlari bo‘yicha Oliy komissarining Markaziy Osiyodagi boshqarmasi va BMT Taraqqiyot dasturining O‘zbekistondagi vakolatxonasi bilan hamkorligida tashkil etildi.

Ta’kidlanganidek, inson huquqlari sohasidagi ta’lim yoshlarni xalqaro hamjihatlik, hamkorlik, totuvlik va inson huquqlari hamda asosiy erkinliklariga hurmat, mas’uliyat ruhida tarbiyalash, inson huquqlarini himoyalash va kafolatlash, inson huquqlari umumiy madaniyatini taraqqiy toptirishda muhim ahamiyatga egaligini inobatga olgan holda, yosh avlod orasida inson qadr-qimmati tengligini rag‘batlantirishga qaratilgan ta’lim dasturlari va tadbirlarini o‘tkazish dolzarblik kasb etadi.

Vebinarni o‘tkazishdan maqsad talabalarni inson huquqlarini himoya qilishning universal va mintaqaviy mexanizmlari, inson huquqlari sohasidagi dolzarb muammolari va ularni yechish yo‘llaridan xabardor qilish, inson huquqlari bo‘yicha bilim va ko‘nikmalarni shakllantirish, inson huquqlari madaniyatini tarbiyalash, shuningdek, O‘zbekiston Respublikasining inson huquqlari sohasida xalqaro tashkilotlar bilan hamkorlik aloqalari holatidan xabardor qilish bo‘ldi.

O‘zbekiston Respublikasida demokratik huquqiy davlat barpo etish ko‘p jihatdan fuqarolik-huquqiy ta’lim darajasiga bog‘liq. BMT tomonidan ilgari surilgan “ta’lim demokratiya asosi” formulasi maktab, oliy ta’lim muassasalari va o‘qituvchining mazkur vazifani bajarishdagi alohida o‘rnidan dalolat beradi. Jamiyat taraqqiyotida yosh avlod ta’lim-tarbiyasi, shuningdek, ta’lim-tarbiya jarayoni rahbari – o‘qituvchi, murabbiyning tayyorgarlik darajasi ham katta ahamiyatga ega. Shunga ko‘ra, vebinar ishtirokchilari kadrlar tayyorlashning mukammal tizimini shakllantirish, inson huquqlari bo‘yicha ta’limning xalqaro standartlarini samarali bajarish va inson huquq va erkinliklariga rioya etilishini ta’minlash masalalariga qiziqish bildirdilar.

Interaktiv muloqot ishtirokchilari O‘zbekiston Respublikasining inson huquq va erkinliklarini ta’minlash borasidagi xalqaro majburiyatlarini bajarishdagi fidoiyligi, fuqarolar, jamiyat va davlat tomonidan Inson huquqlari umumjahon deklaratsiyasining O‘zbekiston Respublikasi Konstitutsiyasi va milliy qonunchilikda e’tirof etilgan prinsip va qadriyatlariga bildirilayotgan qiziqishni ta’kidlab o‘tdilar. Buning isboti sifatida esa O‘zbekiston Respublikasi Prezidentining “Inson huquqlari umumjahon deklaratsiyasi qabul qilinganligining 70 yilligiga bag‘ishlangan Tadbirlar dasturi to‘g‘risida”gi Farmonining qabul qilinishini keltirish mumkin.

Shu bilan bir qatorda, ishtirokchilar Inson huquqlari umumjahon deklaratsiyasi qabul qilinganidan ancha vaqt o‘tgan bo‘lsada, xalqaro huquqning umume’tirof etilgan tamoyil va me’yorlarining buzilishi hamon dolzarbliligicha qolganini aytib o‘tdilar.

Vebinar davomida, shuningdek, O‘zbekistonning inson huquq va erkinliklari sohasidagi xalqaro hamkorlik aloqalarini mavjud muammolarning ochiq va konstruktiv muhokamasi tamoyillariga, inson huquqlari xalqaro standartlari implementatsiyasi bo‘yicha ilg‘or tajriba almashinuviga, bundan tashqari, BMTning nizomiy va shartnomaviy organlari, inson huquqlari bo‘yicha maxsus ma’ruzachilar, xalqaro tashkilotlar, jumladan, yevropa Ittifoqi, yevropada xavfsizlik va hamkorlik tashkiloti, Islom hamkorlik tashkiloti va boshqa xalqaro va xorijiy tuzilmalar bilan hamkorlikni kengaytirish asosida chuqurlashtirish lozimligi ham ta’kidlandi.

O‘zbekiston Respublikasi dunyoda yoshlar huquqi targ‘ibotida faol ishtirok etib kelmoqda, xususan, mamlakat globallashuv sharoitida yoshlarga oid siyosatni amalga oshirishga yo‘naltirilgan Yoshlar huquqi to‘g‘risidagi BMT Konvensiyasini tayyorlash, shuningdek, BMT Bosh Assambleyasining asosiy maqsadlaridan biri bag‘rikenglik va o‘zaro hurmatni mustahkamlashga bosh qo‘shish, diniy erkinlikni ta’minlash, e’tiqod qiluvchilar huquqlari himoya qilish, ularning kamsitilishiga yo‘l qo‘yilmaslikka qaratilgan “Ma’rifat va bag‘rikenglik” maxsus rezolyusiyasini ishlab chiqishning tashabbuskori bo‘ldi.

Ishtirokchilar O‘zbekistonning inson huquq va erkinliklari sohasidagi xalqaro majburiyatlari ijrosi masalalariga ham alohida e’tibor qaratdilar. Mazkur tizimning muhim tarkibiy qismi milliy ma’ruzalarni ko‘rib chiqish natijalari yuzasidan BMT ustav va shartnomaviy organlari tavsiyalarini bajarishga yo‘naltirilgan harakatlar milliy rejalarini tayyorlash va qabul qilishdan iborat.

Talabalar Birlashgan millatlar tashkilotining Inson huquqlari bo‘yicha Oliy komissari boshqarmasining inson huquq va erkinliklari xalqaro standartlarini amalga oshirishda mamlakatlarga metodik va texnik yordam ko‘rsatish yuzasidan rejalari bilan ham qiziqishdi.

Bugun, 19-may kuni Toshkent davlat iqtisodiyot universitetida Jahon iqtisodiyoti kafedrasi hamda O‘zbekiston Respublikasi Innovatsion rivojlanish vazirligi hamkorligida “Mamlakatimizning investitsion jozibadorligini oshirish, faol tadbirkorlik va innovatsion faoliyatni qo‘llab-quvvatlashda erkin iqtisodiy hududlardan samarali foydalanish” mavzusida ilmiy-amaliy seminar o‘tkazildi.

Seminar ishini Toshkent davlat iqtisodiyot universiteti rektori Bahodir Xodiev, O‘zbekiston Respublikasi Innovatsion rivojlanish vazirining o‘rinbosari Sherzod Shermatov kirish so‘zi bilan ochib berdi.

Ilmiy-amaliy seminarni o‘tkazishdan asosiy maqsad O‘zbekiston Respublikasi Prezidentining 2018 yil 5 maydagi “Faol tadbirkorlik va innovatsion faoliyatni rivojlantirish uchun shart-sharoitlarni yaratish bo‘yicha qo‘shimcha chora-tadbirlar to‘g‘risida”gi PQ 3697-sonli qarori, 2018 yil 7 maydagi “Iqtisodiyot tarmoqlari va sohalariga innovatsiyalarni joriy etish mexanizmlarini takomillashtirish bo‘yicha qo‘shimcha chora-tadbirlar to‘g‘risida”gi qarorlaridan kelib chiqqan holda oliy ta’lim muassasalari hamda sanoat korxonalari o‘rtasidagi hamkorlikni innovatsion faoliyat doirasida tashkil etish, shuningdek erkin savdo hududlari faoliyatida xorijiy sarmoyalarni jalb etgan holda innovatsion faoliyatni rivojlantirishga qaratilgan.

Ilmiy-amaliy seminarda kafedra yosh olimlari, doktorantlar va talabalar o‘z taqdimotlari, innovatsion ishlanmalari bilan ishtirok etishi, amaldagi muammolar atroflicha o‘rganilib, ularga aniq yechimlar topishga alohida e’tibor qaratildi.

Ushbu ilmiy-amaliy seminarda O‘zbekiston Respublikasi Innovatsion rivojlanish vazirligi, Tashqi savdo vazirligi, Davlat investitsiya qo‘mitasi, Navoiy erkin iqtisodiy hududi korxonalari vakillari, shuningdek bir qator tashqi iqtisodiy faoliyat bilan shug‘ullanuvchi tadbirkorlar, professor-o‘qituvchilar va talabalar ishtirok etdi.

Toshkent davlat iqtisodiyot universiteti 2-bino majlislar zalida Germaniya hamda xorijda ko’p yillik tajribaga ega bank va moliya-kredit masalalari bo’yicha yetakchi mutaxassis Peter von Kapri bilan uchrashuv bo’lib o’tdi.

Germaniyalik olim o‘z ma’ruzasi davomida Loyiha menejmenti sohasi va boshqaruv masalalarida to‘plagan uzoq muddatli tajribasi haqida ta’lim dargohimizning ilmiy izlanuvchilariga gapirib berdi.

2018 yil 26-27 aprel kunlari Toshkent davlat iqtisodiyot universitetida Kichik sanoat zonalari direksiyalari rahbarlari hamda xodimlari malakasini oshirishga bag‘ishlangan maxsus o‘quv kursining navbatdagi mashg‘ulotlari ham mazmunli va qizg‘in savol-javob ruhida o‘tdi.

Unda Toshkent viloyatidagi kichik sanoat zonalari direktorlari va xodimlari ishtirok etishdi.

Taqdim etilgan ma’ruzalarda, eng avvalo, kichik sanoat zonalarini tashkil etishning ahamiyati, ularni boshqarish bo‘yicha direksiya va yagona direksiyalarning faoliyatini tartibga soluvchi me’yo­riy-huquqiy hujjatlarga izohlar berib o‘tildi, ba’zilariga kiritilgan o‘zgartishlar mohiyati tushuntirildi. Kichik sanoat zonalarida joylashtirish uchun investitsiya loyihalarini tanlab olish tartibi, xususan, tanlov e’loni, tanlov e’lonida ko‘rsatilishi shart bo‘lgan hamda tanlov mezonlariga oid ma’lumotlar haqida so‘z yuritildi.

Shuningdek, ma’muriy kengash qaroriga muvofiq, direksiyaning asosiy vazifalari kichik sanoat zonasi qatnash­chilari bilan loyihani amalga oshirish bo‘yicha kelishuv, ishlab chiqarish maydonlarini uzoq muddatli ijaraga berish hamda kichik sanoat zonasi hududida xizmat ko‘rsatish bo‘yicha shartnomalar tuzish, o‘zaro kelishuvlardagi majburiyatlar bajarilishi yuzasidan monitoring yuritish, qatnashchilarga ishlab chiqarish, moliyaviy, marketing, huquqiy, tashqi savdo va boshqa masalalarda ko‘mak berishdan iborat ekanligi ta’kidlandi.

Ishtirokchilar e’tiboriga kichik sanoat zonalarini tashkil etish va ularni rivojlantirish, bunday zonalardagi faoliyatni boshqarish, kadrlar tayyorlash, investitsiyalarni jalb qilishning Xitoy, Singapur kabi davlatlar taj­ribasi haqida taqdimotlar namoyish etildi.

Mashg‘ulot dasturining har bir mavzusi o‘zaro muloqot, axborot almashish hamda savol-javob ruhida o‘tdi.

2018-yil 20-aprel kuni Toshkent davlat iqtisodiyot universitetida “Mehnat munosabatlaridagi asosiy prinsiplar va nomalarga rioya etish masalalari” mavzusida seminar bo‘lib o‘tdi. Unda Bandlik va mehnat munosabatlari vazirligining Yuridik bo‘lim boshlig‘i D. Matrasulov, Toshkent shahar prokuraturasining bo‘lim prokurori D. Noyobjonov, Toshkent shahar bandlik bosh boshqarmasining Davlat mehnat huquqiy inspeksiyasining mas’ul xodimi E. Saidov, Toshkent davlat iqtisodiyot universiteti professor-o‘qituvchilari va talaba-yoshlar ishtirok etdi.

Tadbirni universitet prorektori Zohidov G‘ofurjon kirish so‘zi bilan ochib berdi.

So‘zga chiqqanlar tomonidan aholi, avvalo yoshlar bandligini va mehnat resurslaridan oqilona foydalanishni ta’minlash borasida mehnat organlarining mas’uliyatini oshirish maqsadida amalga oshirilayotgan ishlar to‘g‘risida keng ma’lumot berib o‘tildi.

Shuningdek, tadbirda Vazirlar Mahkamasida “Hududlarda dala va tozalash-obodonlashtirish ishlariga tibbiyot va ta’lim muassasalari xodimlari, talabalar va ijtimoiy soha vakillarini jalb qilishni taqiqlash va ushbu holatlarga yo‘l qo‘ygan barcha darajadagi hokimlar va rahbarlarning shaxsiy mas’uliyat va javobgarligini oshirishga qaratilgan choralarni belgilash” masalasiga bag‘ishlangan videoselektor yig‘ilishi bo‘lib o‘tgani aytib o‘tildi. Hukumat yig‘ilishida Prezidentimiz Shavkat Mirziyoev tomonidan ijtimoiy soha xodimlari, xususan, shifokorlar, o‘qituvchilar va talaba-yoshlarni jamoat ishlariga jalb qilishning oldini olish, majburiy mehnatga taqiq qo‘yish, rahbar xodimlarning hududlarda ko‘zbo‘yamachilikka yo‘l qo‘yishining oldini olishga qaratilgan topshiriqlari ijrosi, bu borada aniq mexanizmni ishlab chiqish va qat’iy nazorat o‘rnatish borasidagi ishlar muhokama etilgani ta’kidlandi. Bu borada hali hanuz turli huquqbuzarlik holatlari, fuqarolar, aholi tomonidan ariza, shikoyatlar mavjud. Bu kabi illatlarni tarqalishi va bunga yo‘l qo‘yishni oldini olish bo‘yicha aniq chora-tadbirlar olib borilayotgani ta’kidlandi.

Mutasaddilar tomonidan mehnatga haq to‘lash tizimi, bayram kunlari, dam olish kunlari, mehnat nafaqalari (homiladorlik davri, yosh bola tarbiyasi, bemorlik, pensiya va boshqalar), mehnat ta’tili, sog‘liqni tiklash ta’til shartlari kabi ko‘plab aholining kundalik imtiyozlari haqida ma’lumotlar berildi.

Ma’ruzachilarning chiqishlari davomida prorfessor-o‘qituvchi va talaba-yoshlar o‘zlarini qiziqtirgan savollarini berib, ularga atroflicha javob olishdi.

Nodir HASANOV,
Ta’lim-tarbiya maslahatchisi

2018-yil 10-aprel kuni Toshkent davlat iqtisodiyot universitetida O‘zbekiston yozuvchilari uyushmasi, “O‘zbekiston tarixi” hamda Ijtimoiy fanlar kafedralari hamkorligida buyuk davlat arbobi va sarkarda Amir Temur tavalludining 682 yilligiga bag‘ishlab “Amir Temur va temuriylar davri tarixiy, madaniy, ma’naviy merosi va uning jahon sivilizatsiyasidagi o‘rni” mavzusidagi ilmiy seminari tashkil etildi.

Tadbirni Toshkent davlat iqtisodiyot universiteti rektori, iqtisod fanlari doktori, professor Bahodir Xodiyev kirish so‘zi bilan ochib berdi. Seminarda “Amir Temur buyuk davlat arbobi” mavzusi bilan O‘zbekiston xalq yozuvchisi, O‘zbekiston yozuvchilari uyushmasi raisi Muhammad Ali, “Amir Temur davrida ilm-fan, san’at va madaniyat rivoji” mavzusida Islom Karimov nomidagi ilmiy-ma’rifiy memorial majmua rahbari Temur Shirinov, “Amir Temurning insoniyat sivilizatsiyasiga qo‘shgan hissasi” mavzusida “Temuriylar tarixi” davlat muzeyi katta ilmiy xodimi, tarix fanlari nomzodi Ozoda Raxmatullaeva, “Amir Temur davlatining moliyaviy-iqtisodiy munosabatlari” mavzusida “Temuriylar tarixi” davlat muzeyi katta ilmiy xodimi Farrux Avazovlar o‘z ilmiy ma’ruzalari bilan so‘zga chiqdi.

Ilmiy seminar ma’ruzachilari tomonidan bobokalonimiz shon-shuhrati uning hayotlik chog‘idayoq yetti iqlimga yetganligi, Amir Temur ko’plab janglar o‘tkazib birortasida ham yengilmagan mashhuri zamon sarkarda bo‘lganligi, davlat tuzilishi ishlariga, ilm-fan, ma’rifat, madaniyat taraqqiyotiga ulkan hissa qo‘shgan siyosiy arbob sifatida tarixga kirganligi, Amir Temur tarafidan tarqoq o‘lkalar yagona davlat bayrog‘i ostida birlashtirilib, barqarorlashgandan keyin yurt iqtisodiyoti mustahkamlanganligi, savdo hamda hunarmandchilik, ishlab chiqarish rivojlanganligi, uzoq va yaqin qo‘shni mamlakatlar bilan savdo-xo‘jalik aloqalari kengayganligi, Amir Temur va temuriylar davri tarixiy, madaniy, ma’naviy merosi va uning jahon sivilizatsiyasidagi o‘rni haqida seminar ishtirokchilariga ma’lumotlar berildi. Shu bilan birgalikda, tadbirda ishtirok etgan olimlar, jamoatchilik vakillari, talaba-yoshlar tengsiz azmu shijoat, mardlik va donishmandlik ramzi bo‘lgan bobokalonimiz buyuk saltanat barpo etib, davlatchilik borasida o‘zidan ham amaliy, ham nazariy meros qoldirganligi, ilm-fan, madaniyat, bunyodkorlik, din va ma’naviyat rivojiga keng yo‘l ochganligini ham ta’kidladilar.

Ilmiy seminar ishtirokchilari Amir Temurning buyuk shaxs sifatida ulkan falsafiy salohiyati, bunyodkorligi, insonlarda kamdan-kam uchraydigan noyob qobiliyat sohibi bo‘lganligi, buyuk ajdodimizning sarkardalik xislatlari, davlat arbobi, ilm-fan homiysi sifatida amalga oshirgan ezgu ishlari haqida ko‘plab ma’lumotlarga ega bo‘ldilar.

Bobokalonimiz bosib o‘tgan yo‘l yoshlarning yetuk ajdodlarimizga munosib voris, porloq kelajak bunyodkori sifatida kamol topishi, ta’lim-tarbiya olishida ibrat namunasi bo‘ldi.

Ushbu tadbir doirasida “Amir Temurning o‘zbek davlatchilik tarixida tutgan o‘rni” mavzusida o‘tkazilgan viktorina g‘oliblari taqdirlandi.

12-16 mart kunlari Xalqaro aloqalar bo‘limi tomonidan Britaniya tadqiqot markazi hamkorligida Ingliz tili kafedrasi professor-o‘qituvchilari uchun 5 kunlik seminar treyning tashkillashtirildi. Seminar treyningni Britaniya tadqiqot markazi o‘qituvchisi Magda Sobshinskaya olib bordi. Ingliz tili professor-o‘qituvchilari seminar treyningdan zamonaviy o‘qitish texnologiyalarni hamda o‘qituvchilarga o‘qitish va o‘qish bo‘yicha o‘z nuqtai nazarlarini tanqidiy ravishda qayta ko‘rib chiqish, darslarni yaxshiroq tayyorlash va o‘tkazish uchun ularning amaliy ko‘nikmalarini baholash imkoniyatini berish metodlari va texnologiyalari muamolarini o‘rgandilar.

Seminar treyning kafedra professor o‘qituvchilarda katta taassurot qoldirdi.

2018-yil 3-fevral kuni Toshkent davlat iqtisodiyot universitetida doktorantlar, tayanch doktarantlar va mustaqil izlanuvchilarning ilmiy-uslubiy seminari bo‘lib o‘tdi.

Tadbirni universitet rektori Bahodir Xodiev kirish so‘zi bilan ochib, ta’lim dargohimizda ilmiy tadqiqotlar sohasida olib borilayotgan tizimli ishlar va 2018 yilda izlanuvchilar oldida turgan muhim vazifalar, oliy ta’lim — ilm-fan — ishlab chiqarish integratsiyasini amalga oshirishning usul va vositalari xususida gapirib o‘tdi.

Shundan so‘ng, Oliy attestatsiya komissiyasi raisi Ahmadbek Yusupov so‘zga chiqib, oliy o‘quv yurtidan keyingi ta’lim tizimi, doktarantlarning ilmiy tadqiqot ishlari bilan shug‘ullanishlari uchun yaratilayotgan sharoitlar va qabul qilinayotgan me’yoriy hujjatlarning mazmun-mohiyati haqida atroflicha to‘xtalib o‘tdi.

Tadbir davomida ilmiy izlanuvchilar o‘zlarini qiziqtirayotgan, duch kelayotgan muammolar yechimi, faoliyat davomida e’tibor qaratish lozim bo‘lgan jihatlar yuzasidan ma’ruzachilardan atroflicha ma’lumot olindi.

O‘zbekiston Respublikasi Vazirlar mahkamasi huzuridagi Oliy attestatsiya komissiyasi tomonidan nashrga tayyorlangan “Dissertatsiya va dissertatsiya avtoreferatini rasmiylashtirish qoidalari”, “Dissertatsiyalar ilmiy natijalarining amaliyotga joriy qilinishini baholash bo‘yicha uslubiy ko‘rsatmalar” risolasi ishtirokchilarga tarqatildi.

***

Mazkur seminar O‘zbekiston Respublikasi Prezidentining 2018-yil 22-yanvardagi “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga oid davlat dasturi to‘g‘risida”gi farmoniga muvofiq tashkil etildi.