YANGILIKLAR

Bo'lim: Seminarlar

Bugun, 3-mart kuni Toshkent davlat iqtisodiyot universitetida Moliya vazirligi mutasaddi vakillari, Buxgalteriya hisobi va audit fakulteti professor-o‘qituvchilar, ilmiy izlanuvchilar hamda talaba-yoshlar ishtirokida ilmiy-amaliy seminar bo‘lib o‘tdi.

Seminarda Moliya vazirligi Buxgalteriya hisobi va audit uslubiyati boshqarmasi boshlig‘i Xudoybergan Ortiqov tomonidan O‘zbekiston Respublikasi Prezidentining “Moliyaviy hisobotning xalqaro standartlariga o‘tish bo‘yicha qo‘shimcha-chora-tadbirlar to‘g‘risida”gi qarorining mazmun-mohiyati ochib berildi. Shuningdek, u o‘z so‘zida moliyaviy hisobotning xalqaro standartlariga o‘tishni jadallashtirish orqali xorijiy investorlarni zarur axborot muhiti bilan ta’minlash va xalqaro moliya bozorlariga kirish imkoniyatlarini kengaytirish, hisob va audit sohalari mutaxassislarini xalqaro standartlar bo‘yicha tayyorlash tizimini takomillashtirish maqsadlari haqida ma’lumotlar berib o‘tdi.

Qarorga ko‘ra, moliyaviy hisobotni ixtiyoriy ravishda MHXSga muvofiq tayyorlaydigan tadbirkorlar buxgalteriya hisobining milliy standartlari bo‘yicha moliyaviy hisobot taqdim etishdan ozod etiladi.

Aksiyadorlik jamiyatlari, tijorat banklari, sug‘urta tashkilotlari va yirik soliq to‘lovchilar toifasiga kiritilgan yuridik shaxslar 2021 yil 1 yanvardan boshlab, moliyaviy hisobotning xalqaro standartlari (MHXS) asosida buxgalteriya hisobi yuritilishini tashkil etadi. 2021 yil yakunlaridan boshlab moliyaviy hisobotni MHXS asosida tayyorlaydi. 2021 yil yakuniga qadar «MHXS bo‘yicha moliyaviy hisobot» fanini muvaffaqiyatli topshirganligi to‘g‘risidagi hujjatga yoki xalqaro buxgalter sertifikatiga ega kamida 3 ta buxgalteriya xizmati xodimlari faoliyatini ta’minlaydi.

Shuningdek, 2021 yildan boshlab, MHXS va auditning xalqaro standartlari bo‘yicha o‘qitish faqat buxgalteriya hisobi sohasidagi xalqaro tashkilotning akkreditatsiyasidan o‘tgan o‘quv markazlari tomonidan amalga oshiriladi.

Xalqaro buxgalter sertifikatiga ega bo‘lgan talabgorlar oliy ta’lim muassasalari magistraturasining «Buxgalteriya hisobi» va «Audit» mutaxassisliklariga kirish imtihonlarini topshirmasdan to‘lov-kontrakt asosida kirish huquqiga ega bo‘ldi.

Tadbir yakunida mutaxassislar tomonidan ishtirokchilarni qiziqtirgan savollarga atroflicha ma’lumot berib o‘tildi.

 

Toshkent davlat iqtisodiyot universitetida “Yevropa kompaniyalari uchun O‘zbekistonda biznes” mavzusidagi seminar bo‘lib o‘tdi.

Jean Monnet (Jean Monnet) modulining asosiy maqsadi talabalarning Yevropa ittifoqi tajribasi bo‘yicha moliyaviy vositalardan foydalanish va ish olib borish sohasidagi bilimlarini kengaytirishdan iborat bo‘lib, bu ularga zamonaviy biznes imkoniyatlariga moslashish va xorijlik sheriklar bilan ishlashga tayyor bo‘lish va innovatsion vositalardan foydalanish imkonini beradi.

Mazkur loyihaning yana bir muhim maqsadi keng jamoatchilik, shu jumladan, akademik hamjamiyat vakillari va biznes ekspertlariga Yevropa Ittifoqining o‘ziga xos xususiyatlari va yetakchi amaliyotlari haqida ma’lumot berish, shuningdek ularni Yevropa Ittifoqi tajribasini o‘rganish va mahalliy darajada ilg‘or tajribalarni o‘rganish imkoniyatlarini muhokamaga jalb etishdan iborat.

Talabalar, ilmiy xodimlar, biznes maqsadli auditoriya hisoblanadi. EMESBEF kursining maqsadi talabalarni atrof-muhit sohasidagi keng doiradagi nazariy va amaliy istiqbollar, yevropa biznesi va moliya strategiyasi hamda uni tashkil etish bilan tanishtirish hisoblanadi. Kurs davomida talabalar xalqaro firmalarning murakkab ko‘p madaniyatli muhitida imkoniyat va xavflarni baholash, firmalar manbalarini (resurslarini) tahlil qilish va xalqaro raqobatbardosh strategiyalar shaklidagi yechimlarni ishlab chiqish bo‘yicha nazariy ko‘nikmalarni rivojlantirishlari kerak. Ular bozorga kirishning ma’lum shakllarini aniqlash imkoniyatiga ham ega bo‘lishlari kerak.

Mazkur kursning asosiy xususiyati ma’ruzalar davomida olingan nazariy tushunchalar va ularni voqyelikda mavjud firmalar tomonidan amalda qo‘llash o‘rtasidagi bog‘liqlikka muhim ahamiyat berishdan iborat. Bu aloqani ta’kidlash uchun nazariy tushunchalar hozirgi kunda global muhitda ishlayotgan yevropa Ittifoqi kompaniyalari faoliyat borasida ko‘plab misollardan foydalangan holda ketma-ketlikda tushuntirildi.

O‘qituvchilar uchun mazkur modul ikki tomonlama ta’sirga ega. Bir tomondan, EMESBEF modulida keltirilgan ma’lumotlar O‘zbekiston uchun yangi hisoblanadi va uning ba’zi qismlari boshqa universitetlarning o‘qituvchilari tomonidan mavjud kurslarga kirish uchun qabul qilinishi mumkin. Boshqa tomondan, moduldagi ma’ruza va seminarlarda amaliy tadqiqotlarni tahlil qilish uchun qo‘llanilgan bir qator uslubiy yondashuvlar auditoriya mashg‘uloti uchun mutlaqo yangi bo‘lib, universitetdagi o‘quv materiallarini ishlab chiqishda jiddiy e’tibor talab etadi.

Professionallar, siyosatchilar va biznes vakillari uchun ishbilarmonlik muhiti, yevropalik hamkasblarning strategiya va amaliyoti bilan bog‘liq mavzularni bevosita muhokama qilish tobora dolzarblashib, muhim ahamiyat kasb etmoqda. Modul yangi istiqbollarni ochishi, mavjud muammolarni hal etish yo‘llarini taklif qilishi va yevropa Ittifoqi institutlari va korxonalari bilan aloqa o‘rnatishga yordam berishi mumkin.

 

Moliya va soliqlar kafedrasi tomonidan yangilangan Soliq kodeksi loyihasining mazmun-mohiyatiga bag‘ishlangan ilmiy seminar tashkil etildi. Mazkur ilmiy seminarda Oliy Majlis Qonunchilik palatasi deputatlari, parlament quyi palatasi huzuridagi Davlat byudjeti boshqarmasi xodimlari, Moliya vazirligi, Davlat soliq qo‘mitasi vakillari, Toshkent moliya instituti professor-o‘qituvchilari, Toshkent davlat iqtisodiyot universiteti professor-o‘qituvchilari, tayanch doktorantlar, magistratura bo‘limi talabalari ishtirok etdilar.

Innovatsion korporativ hamkorlik doirasida tashkil etilgan ilmiy seminarda yangi tahrirdagi Soliq kodeksi qizg‘in muhokama qilindi. Unda universitetimiz professor-o‘qituvchilari, tayanch doktorantlari tomonidan 20 dan ortiq takliflar berildi, mazkur qonun hujjatining ikkinchi o‘qishda parlamentning quyi palatasida ko‘rib chiqishga tayyorlanishi bosqichiga yana qo‘shimcha ravishda takliflar taqdim qilinishiga kelishib olindi.

2019-yil 27-noyabr kuni Ispaniyaning Fiestalonia Milenio festivallar qo‘mitasi asoschisi va prezidenti David Japaridze ishtirokida seminar-trening o‘tkazildi. Tadbirda Xalqaro turizm fakulteti professor-o‘qituvchilari, talabalar va ushbu mavzuga qiziqqan mutaxassislar ishtirok etdi.

Seminar-treningda sotuvlar hajmini oshirishning zamonaviy marketing usullari yig‘ilganlarga aniq amaliy keyslar misolida oddiy va tushunarli tilda tadbirkor D.Japaridze tomonidan bayon etildi. Xususan, neyromarketingning samarali vositalaridan biri sifatida triggerlardan foydalanish yo‘llari ko‘rsatib o‘tildi.

Ta’kidlash o‘rinliki, universitetning Turizm va servis kafedrasi hamda Ispaniyaning nufuzli turistik festivallar qo‘mitasi o‘rtasidagi ikki tomonlama hamkorlik aloqalari 2014 yildan buyon muntazam davom etib kelmoqda.

Tadbir yakunida ushbu seminar-treningni yuqori saviyada tashkil qilgani uchun D. Japaridzega universitet rektorining Tashakkurnomasi taqdim etildi.

Seminar-trening muhokamalarida faol qatnashgan bir nechta talabalar spiker tomonidan sertifikatlar bilan taqdirlandi.

 

Menejment kafedrasi va «O‘zto‘qimachiliksanoat» uyushmasi tomonidan o‘zaro innovatsion-korporativ hamkorlik shartnomasi asosida ilmiy-amaliy seminar tashkil etildi.

Seminarda «O‘zto‘qimachiliksanoat» uyushmasi vakillari, professor-o‘qituvchilar, mustaqil tadqiqotchi va izlanuvchilar, bakalavriat va magistratura bosqichi talabalari ishtirok etdi.

Ilmiy-amaliy seminarda “Zamonaviy menejment konsepsiyalarini tatbiq etish – korxonani rivojlantirish omili sifatida” mavzusi muhokama etildi.

«O‘zto‘qimachiliksanoat» uyushmasining Strategik istiqbollarni belgilash va ilmiy-tadqiqot ishlarni muvofiqlashtirish bo‘limi boshlig‘i muovini A. Muxitdinov seminar kun tartibidagi mavzu yuzasidan ma’ruza qildi.

Ishtirokchilar mavzu yuzasidan o‘z fikr-mulohazalarini bildirib, ko‘tarilgan muammoli masalalar yuzasidan o‘z takliflarini bildirdilar.

 

Moliya vazirligining amaliyotchi mutaxassislari, Moliya va soliqlar kafedrasi pedagoglari hamkorligida Buxgalteriya hisobi va audit fakultetining Moliya hamda Davlat byudjetining g‘azna ijrosi ta’lim yo‘nalishi talabalari uchun “Kasbiy mahorat maktabi” mavzusida ochiq dars o‘tkazildi.

Ochiq darsda Moliya vazirligining Davlat byudjeti g‘azna ijrosining monitoring qilish departamenti, Budjet hisobi va hisoboti bo‘lim boshlig‘i o‘rinbosari I. Choriyev, Yuridik majburiyatlarni ro‘yxatga olish bo‘limi boshlig‘i F. Raxmonov, Moliyaviy risklarni boshqarish bo‘limi boshlig‘i o‘rinbosari F. Suyarovlar tomonidan mavzu yuzasidan ma’ruza taqdimotlari o‘tkazildi. Yosh moliyachilarga kelgusida yetuk mutaxassis bo‘lishlari uchun amaliy ko‘nikmalar berildi.

Darsda savol-javoblar asosida o‘tkazilib, talabalar o‘z nazariy bilimlarini amaliy ko‘nikmalar bilan boyitdilar. Ushbu mashg‘ulot talaba-yoshlarda katta taassurot qoldirdi.

Tadbir O‘zbekiston Respublikasi Prezidentining 2017-yil 27-iyuldagi “Oliy ma’lumotli mutaxassislar tayyorlash sifatini oshirishda iqtisodiyot sohalari va tarmoqlarining ishtirokini yanada kengaytirish chora-tadbirlari to‘g‘risida”gi qarori ijrosini ta’minlash maqsadida tashkil etildi.

 

2019-yil 6-noyabr kuni O‘zbekistondagi Gyote instituti bilan hamkorlikda nemis tili chet til sifatida o‘qitiladigan oliy o‘quv yurtlari o‘qituvchilari uchun seminar bo‘lib o‘tdi.

Tajriba va fikr almashish, shuningdek nemis tili o‘qituvchilarining malakasini oshirish maqsadida tashkil etilgan seminarda Germaniyaning Mainz universiteti professorlari tomonidan treninglar olib borildi.

Ma’lumot o‘rnida aytish kerakki, Gyote institutiu Germaniya Federativ Respublikasining madaniyat instituti bo‘lib, u butun dunyoga nafaqat Germaniyaning rang-barang hayot tarzini namoyon etadi, balki nemis tili, madaniyati va nemis jamiyati bilan yaqindan tanishish imkonini beradi.

Hozirgi kunda dunyoning 90 mamlakatida 150 ta Gyote institutlari ish olib bormoqda. Toshkentdagi Gyote Instituti esa 1998 yildan buyon faoliyat ko‘rsatib kelmoqda.

Toshkentdagi institutning asosiy vazifasi nemis tilini o‘rgatish va nemis tili o‘qituvchilari malakasini oshirishdan iboratdir. Institut kurslari nafaqat katta yoshlilar, balki bolalar va o‘smirlar uchun ham tashkil etilgan.

 

Toshkent davlat iqtisodiyot universitetining innovatsion-korporativ hamkorlik doirasida ilmiy-amaliy seminarlar tashkil etish rejasiga muvofiq, Xalqaro turizm fakulteti va Marketing kafedrasi tomonidan “Sotish tizimidagi yangi innovatsiyalar” mavzusida mahorat darsi o‘tkazildi. Ushbu mahorat darsida moderator sifatida “Office market”, “Dekos” kompaniyalari hamda “M faktor” loyihasi asoschilari Hasan va Husan Mamasaidovlar ishtirok etdilar. Unda professor-o‘qituvchilar, ilmiy izlanuvchilar, magistratura va bakalavriat bosqichi talabalari ishtirok etdi.

Tadbirni Ilmiy ishlar va innovatsiyalar bo‘yicha prorektor v.v.b. Mansur Eshov kirish so‘zi bilan ochib, professor-o‘qituvchilar va talabalar uchun real sektor korxonalari vakillari bilan o‘tkazilayotgan ilmiy-amaliy seminarlar, uchrashuvlar va mahorat darslari qizg‘in, munozaralarga boy bo‘layotganligini, korxona mutaxassislari o‘zlarining qimmatli bilim va tajribalari bilan o‘rtoqlashishi davomida talabalarning nazariy bilimlarini mustahkamlashga hamda kelgusida ularning biznes va tadbirkorlik faoliyati uchun zamin yaratayotishga hissa qo‘shayotganligini aytib o‘tdi.

Shuningdek, “Universitet 3.0” xalqaro o‘quv-ilmiy tadqiqotlar markazi direktori Sherzod Mustafaqulov so‘zga chiqib, bugungi kunda iqtisodiy tadqiqotlar sohasida ham ilmiy-amaliy tajribalardan foydalanishga katta e’tibor berilayotganligini, iqtisodiyot sohasi bo‘yicha Nobel mukofotining 2019 yildagi laureatlari ham qashshoqlik muammosiga yechimni qog‘ozdagi nazariyalardan emas, real hayotiy tajribalardan izlash kerakligini isbotlab berishganligini, Nobel mukofotining bir yo‘nalishda birvarakayiga uch kishiga Hind-amerikalik Abxijit Banerji va fransuz-amerikalik Ester Dyufloga berilganligini aytib o‘tdi.

Shundan so‘ng, “Office market”, “Dekos” kompaniyalari hamda “M faktor” loyihasi asoschisi Hasan Mamasaidov o‘z ma’ruzasi bilan ishtirokchilarni tanishtirib o‘tdi.

Biznesni muvaffaqiyatli yuritishning biz hatto xayolimizga keltirmagan ko‘plab omillari ham bo‘lishi mumkin. Ko‘pincha bu omillar anchayin salmoqli bo‘ladi. Birov muvaffaqiyatga erishsa, “Omadi yurishdi” yoki “Kerak paytda kerakli joyda bo‘ldi” deydilar. “Omad kelmadi” yoki “O‘xshamay qoldi” deb biznesni yig‘ishtirishga to‘g‘ri kelganda yoki orzusi ushalmaganda aytadilar.

Kecha foyda berayotgan narsa bugun ish bermay qolishi mumkin – qoidalar muntazam o‘zgarib turadi. Shu sababli erishilgan natijada aslo to‘xtab qolmaslik kerak. Ijobiy kayfiyatdagi odamlar bilan muloqot qilish kerak, oldinga yangi maqsadlarni qo‘yish lozim. Intilish, o‘sish va yangi cho‘qqilarni zabt etish uchun har doim sabab topiladi.

Ichki nazorat mezoni – qalb xotirjamligi. Bu ichki olamning boyligida va ijobiy hissiyotlarga to‘lganida ko‘rinadi. Bu – bugungi harakatlarimiz ertangi muvaffaqiyatga va “omad”ga olib kelishini anglash. Bu – kelajakka ishonch.

Xatolar va omadsizliklar hammaning boshida bor. Hayot – ajoyib ustoz, biroq xizmat haqi juda qimmat. Biznes va hayotdagi har qanday tanazzul, inqiroz va muvaffaqiyatsizlik ruhan kuchli zarba beradi va, qanchalik bardoshli bo‘lmaylik, o‘zimizga bo‘lgan ishonchimizga putur yetkazadi. Hafsalangiz pir bo‘lib, hamma narsaga qo‘l siltagingiz keladi. Bunday lahzalarda hayotga qaytadan nazar tashlash va biroz tin olish kerak bo‘ladi. Oila a’zolari va do‘stlarning ma’naviy qo‘llab-quvvatlashi insonni qutqaradi. Ular bilan muloqot, ularning qimmatli va o‘sha paytda dolzarb maslahatlari g‘ayrat-shijoat beradi va mehnatga yangidan ruhlanib qaytish imkonini ochadi. Zero, nimaiki bizni halok qilmasa, u bizni kuchliroq qiladi.

Yaxshi jamoa va ishning to‘g‘ri taqsim qilinishi ham o‘ta muhim jihatlardan biri. Bu xuddi futbol maydoniga o‘xshaydi: kimdir gol uradi, boshqasi darvozani himoya qiladi. Har bir xodim aniq maqsadga ega bo‘lsa, undan nimani kutishayotganligini bilsa va oldiga qo‘yilgan vazifani uddalasa, korxona bundan faqat yutadi va muvaffaqiyatga erishadi.

Bunda kompaniyaning har bir sherigi va va xodimi o‘zining kerakliligini va korxona yutug‘ida ularning ham hissasi borligini his etadi, bu esa shaxsiy kamolot va o‘z ustida ishlash uchun rag‘bat bo‘ladi.

Agar rivojlanmasak, orqaga ketamiz. Ekspert va biznes-trener sifatida seminar va treninglarga taklif qilishlganda men “Ko‘zgular mamlakatiga tushib qolgan Alisa” haqidagi hikoyadan shunday iqtibos keltiraman: “Turgan joyingda qolishing uchun tinimsiz yugurish lozim, biror joyga yetib olish uchun esa, kamida ikki barobar tezroq chopish kerak!” Bolalikda eshitganimiz bu so‘zlarning ma’nosini katta bo‘lganimizdan keyingina tushunamiz. Do‘stlar, real voqyelikka – “mo‘jizalar mamlakati”ga xush kelibsiz, bu yerda raqobat o‘z ustida tinmay ishlashni va doim o‘qlangan miltiqdek taxt turishni taqozo etadi. Hayotning jo‘shqin sur’atidan ortda qolmaslik uchun doimo harakatda bo‘lishimiz, nimagadir erishish uchun jsa, yanada ko‘proq sa’y-harakatlarni amalga oshirishimiz talab etiladi.

Shundan so‘ng so‘z mahorat darsining asosiy ma’ruzachilaridan yana biri “Office market”, “Dekos” kompaniyalari hamda “M faktor” loyihasi asoschisi Husan Mamasaidovga berildi.

— Mamasaidovlar biznes bilan oilaviy shug‘ullanishadi. O‘tgan asrning 90-yillarida «Office Market» brendiga asos solgan Rahmonberdi Mamasaidovning o‘g‘illari – Ikrom, egizaklar Hasan va Husan, Ibrohimlar oilaviy ishni davom ettirib kelishmoqda. Ularning har biri o‘z yo‘nalishini tanlagan va sohalarida muvaffafiyatlarga erishib kelishmoqda.

Biz oilada to‘rt nafar farzandmiz. Maktabda o‘qib yurgan paytlarimizda otamiz bizlarni o‘zlari bilan sayohat va safarlarga olib borishga harakat qilgan. Biroq har safar navbatma-navbat borish sharti bilan. Bugungi kunga kelib dunyoning 30 dan ortiq mamlakatida bo‘lganman. Bu mamlakatlarning juda ko‘pchiligiga biznes seminarlarga, mahorat darslarida ishtirok etish uchun borganman. To‘g‘ri chet mamlakatlarga borib kelish xarajatlari juda qimmat, lekin o‘sha yerdagi mashhur biznes sohasi vakillarining fikrlarini eshitib o‘zim uchun yangi g‘oya, yangi fikrlar olib kelishga harakat qilaman. Men kanselyariya mahsulotlari bilan ishlayman, shu boisdan birinchi bo‘lib notanish shaharga borganimda kanselyariya mahsulotlari sotiluvchi do‘konga yo‘l olaman. Menga nima taklif qilinayotgani va qay tarzda sotilishi qiziqarli. Har safar nimanidir o‘rganamiz, bu kelajakda rivojlanish uchun zamin yaratadi.

Biz Hasan bilan dastavval Toshkent davlat sharqshunoslik institutiga o‘qishga kirganmiz, biroq bir yil o‘tib Toshkent davlat texnik universiteti qoshida ochilgan Malayziya institutining biznesni boshqarish fakultetiga o‘tganmiz. Shuningdek, men O‘zbekiston Prezidenti huzuridagi Davlat boshqaruvi akademiyasini tugatganman. O‘sha paytda ko‘plab qiziqarli safarlarda bo‘lganman, malaka oshirishgi o‘tash uchun grantlarni yutib olishga harakat qilganman, chunki har taraflama rivojlanishni xohlaganman.

Bizning kompaniyamiz Deli markasining O‘zbekistondagi rasmiy distribyutori hisoblanadi. Deli esa mahsulotlarining sotilish hajmi bo‘yicha dunyoning top 10 taligiga kiradi. Shu sababli biz boshqa davlatdan kelgan hamkorlarimiz bilan tez-tez uchrashib turamiz va tajriba almashamiz.

Ma’ruzalar yakunida savol-javoblar bo‘lib o‘tdi. Professor-o‘qituvchilar, ilmiy izlanuvchilar, magistratura va bakalavriat bosqichi talabalari o‘zlarini qiziqtirgan savollar yuzasidan atroflicha ma’lumotga ega bo‘ldilar.

Mahorat darsi yakunida Xalqaro turizm fakulteti dekani Nozima Zufarova, Marketing kafedrasi mudiri Shahnoza Ergashxodjaeva Hasan va Husan Mamasaidovlarga bugungi ishtirok uchun minnatdorchilik bildirib, ularga universitet rektori nomidan “Sertifikat” va esdalik sovg‘alarini topshirishdilar.

 

Xalqaro hamkorlik bo‘limi hamda Jahon tillari kafedrasi tomonidan Germaniya elchixonasining grandlar bo‘limi rahbari Simon Krechmer tomonidan seminar tashkil etildi. Seminar “Germaniya oliygohlari e’lon qilgan grandlar” haqida bo‘ldi.

Simon Krechmer bakalavr bosqichi talabalari uchun yozgi kurslar, magistratura bosqichi talabalari uchun 3-6 oylik o‘qish va ilmiy izlanish olib borayotgan yosh olimlar uchun mavjud grandlar haqida ma’lumotlar berdi. Shundan so‘ng shu yilning yoz oyida grand yutib, Germaniyada tahsil olib kelgan talabalar hisoboti tinglandi.

Iqtisodiyot fakulteti uchinchi bosqich talabasi Abror G‘ofurov, Bugalteriya hisobi va audit fakulteti ikkinchi bosqich talabasi Ulug‘bek Azimov, Iqtisodiyot fakulteti to‘rtinchi bosqich talabalari: Abdulaziz Abdug‘aniev, Ayubxon Axmadxo‘jaev, Asliddin Xurramovlar Aaxen va Svikkau universitetlarida grand asosida tahsil olib, o‘rgangan bilimlarini va o‘z tajribalarini boshqa talabalar bilan o‘rtoqlashdi. Seminar so‘ngida Simon Krechmer grandlarga ariza topshirish boshlanganligi va noyabr oyida OnSet imtihoni bo‘lib o‘tishini va bunda talabalar faol ishtirok etishlarni ta’kidlab o‘tdi.

Seminar jarayoni juda qiziqarli va ma’lumotlarga boy bo‘ldi. Talabalar o‘zlarini qiziqarli savollari bilan faol ishtirok etdi.

 

Toshkent davlat iqtisodiyot universitetining Magistratura bo‘limi tashabbusi bilan Bremen amaliy fanlar universitetining Xalqaro biznes maktabi professori Martina Rorich tomonidan Menejment fanidan o‘quv seminar darslari o‘tkazildi.

O‘quv mashg‘ulotlarida talabalar professional faoliyatda duch kelinishi mumkin bo‘lgan muammoli vaziyatlar, ularni hal etish yo‘llari haqida ma’lumot oldilar. Virtual bozorda esa, boshqa ishtirokchilar bilan raqobatlashishda ahamiyat qaratish lozim bo‘lgan jihatlar xususida ma’lumotlarga ega bo‘ldilar. O‘tkazilgan 15 juftlik soatdan iborat darslar davomida talabalar guruhlarda va turli holatlarda ishlash, turli vaziyatlarga doir ijodiy yondashuvlarni ilgari surish, har bir duch kelinishi mumkin bo‘lgan holatlar uchun yechimlar taklif qilish orqali o‘z bilimlarini mustahkamladilar.

Germaniyalik olima ishtirokida o‘tkazilgan o‘quv seminar darslari yakunida Xalqaro hamkorlik bo‘yicha prorektor Dilorom Begmatova, Magistratura bo‘limi boshlig‘i Nodir Akbarov va boshqalar Martina Rorich xonimga amaliy hamkorlik uchun samimiy minnatdorlik bildirildi.

O‘z navbatida Martina Rorich yuqori saviyadagi tashkilotchilik, bilimga chanqoq talabalarning samimiyati uchun tashakkur izhor qilib, kelgusida ham mustahkam hamkorlik doirasida faoliyat olib borishga tayyor ekanligini bildirdi.